Azərbaycan prezidenti İlham Əliyev bazar ertəsi Sumqayıtda bir sıra istehsal müəssisələrin və sosial obyektlərin açılışında və təməlqoyma mərasimlərində iştirak edib. Bu barədə dövlət başçısının saytında məlumat verilir.
Xüsusilə, prezident Sumqayıt Kimya Sənayesi Parkında “Çinar-Servis” İstehsal-kommersiya firmasının Texniki qazların istehsalı müəssisəsi və “Kartaş Kimya” MMC-nin müxtəlif Tikinti kimyəvilərinin istehsalı müəssisəsinin təməlini qoyub.
Bundan əlavə, Əliyev Sumqayıt Kimya Sənayesi Parkında “Novus Plastica” MMC-nin Polimer qatqıları istehsalı müəssisəsinin, “Universal Qablaşdırma Sənayesi” QSC-nin Qablaşdırma məhsulları istehsalı müəssisəsinin, “Azərbaycan Vanhong Ceramics Co.” MMC-nin Keramik plitələr istehsalı müəssisəsinin açılışında iştirak edib.
Həmçinin, dövlət başçısı yenidən qurulan Mehdi Hüseynzadə adına Sumqayıt şəhər stadionunda yaradılan şəraitlə tanış olub, 2 saylı Sumqayıt Şəhər Xəstəxanasının yeni binasının açılışında iştirak edib. **
N.Abbasova