Almaniya və Aİ Azərbaycanla Ermənistana münasibətlərin normallaşdırılması məsələsində bundan sonra da dəstək verməyə hazırdır. Bunu Almaniya Federativ Respublikasının xarici işlər naziri Annalena Berbok bu gün azərbaycanlı həmkarı Ceyhun Bayramovla danışıqlardan sonra keçirilən mətbuat konfransında deyib.
“Bölgədə sülhə ehtiyac var, bu, həm Azərbaycanın, həm də Ermənistanın marağındadır. Almaniya və Aİ hər iki ölkəni münasibətlərin normallaşdırılması məsələsində dəstəkləməyə hazırdır”, - deyə Berbok bildirib.
O əlavə edib ki, Almaniya Azərbaycanın ərazi bütövlüyünü hər zaman tanıyıb və Qarabağı Azərbaycanın ərazisi hesab edir.
Almaniya XİN başçısı vurğulayıb ki, Ermənistan-Azərbaycan sərhədinin delimitasiyası kifayət qədər mürəkkəb prosesdir.
Berbok əlavə edib ki, Almaniya minatəmizləmə məsələsində Azərbaycana kömək etməyə hazırdır və Bakıya müvafiq layihə təklif edib.
O, Bakıda keçirdiyi görüşlərin nəticələrindən razı qaldığını diqqətə çatdırıb.*
X.Nəsirzadə