İran prezidenti İbrahim Rəisi Qəzza zolağının bombardmanını ən qısa zamanda dayandırmağa, habelə anklavın blokadasının aradan qaldırılması və humanitar yardımın çatdırılması üçün yolların açılması ilə bağlı çağırış edib. ISNA agentliyi xəbər verir ki, Rəisi ƏrəbDövlətləriLiqasının (ƏDL) Sammitinə yola düşməzdən öncə bu açıqlamaları verib.
Rəisi Yaxın Şərqdə baş verən hadisələr qarşısında İslam ölkələrinin birliyinin vacibliyini vurğulayıb. O qeyd edib ki, Qəzza ilə əlaqədar vəziyyətlə bağlı danışmaq yox, hərəkət etmək lazımdır.
"Qəzza zolağında sionist rejimin barbar hərəkətləri hərbi cinayətlərin və bəşəriyyətə qarşı cinayətlərin bariz nümunəsidir. Bu İslam dini icması və bəşəriyyət üçün çox vacib məsələdir. Qəzza zolağının bombardmanları dərhal dayandırılmalı, blokada aradan qaldırılmalı və yardım göndərmək üçün yollar açılmalıdır ", - İran lideri bildirib.
Prezident həmçinin bəyan edib ki, Birləşmiş Ştatlar mütəmadi olaraq İrana və digər dövlətlərə eskalasiyanın yolverilməzliyi barədə siqnal göndərir, lakin özləri atəşkəsə mane olur və hərbi əməliyyatların miqyasını genişləndirir. **