Azərbaycanla Ermənistan arasında münasibətlərin normallaşdırılması və sülh sazişinin imzalanması konstruktiv qarşılıqlı fəaliyyətin mövcud olduğu halda mümkündür.
“İnterfaks-Azərbaycan” agentliyi xəbər verir ki, bu barədə ATƏT Parlament Assambleyasının sədri Pia Kauma (Finlandiya) və Cənubi Qafqaz üzrə xüsusi nümayəndə Kari Henriksenin (Norveç) Azərbaycana çərşənbə axşamı başa çatmış səfərinin yekunlarına dair bəyanatında deyilir.
“Azərbaycana səfər çərçivəsində ATƏT PA sədri və Cənubi Qafqaz üzrə xüsusi nümayəndə ölkənin siyasi liderliyi ilə sentyabrda Bakının Qarabağ regionu üzərində nəzarəti bərpa etməsindən sonra Ermənistanla tam nizamlanmaya nail olunmasının vacibliyini müzakirə edib. Sülh sazişi və münasibətlərin normallaşdırılmasının irəliyə aparılması üçün konstruktiv qarşılıqlı fəaliyyət vacibdir”, - deyə bəyanatda bildirilir.
“Bütün tərəflər sülh prosesinin irəliyə aparılmasının beynəlxalq sabitlik maraqlarına cavab verməsi ilə razılaşıblar”, - deyə bəyanatda vurğulanır.
ATƏT PA nümayəndə heyəti Azərbaycan hökumətinin Qarabağın bərpası istiqamətində əhəmiyyətli səylərini müsbət qiymətləndirib.*
R.Əhmədov