Bakı İrəvanla ikitərəfli əsasda sərhədin delimitasiyası üzrə danışıqların intensivləşməsinin tərəfdarıdır. Bu sözləri xarici işlər naziri Ceyhun Bayramov dekabrın 5-də Moskvada Rusiyanın xarici işlər naziri Sergey Lavrovla görüşü zamanı bildirib.
Xarici İşlər Nazirliyindən verilən məlumata görə, görüş zamanı Azərbaycan və Rusiya arasında əməkdaşlıq məsələləri, habelə Azərbaycanla Ermənistan arasında normallaşma prosesinin cari vəziyyəti və perspektivləri müzakirə olunub.
Nazirlər ikitərəfli gündəliyin bir sıra istiqamətlərində, o cümlədən siyasi, iqtisadi, ticarət, humanitar, təhsil, mədəniyyət sahələrində əməkdaşlıq münasibətlərinin inkişafı perspektivlərini müzakirə ediblər.
C.Bayramov Azərbaycanın Ermənistanla sülh prosesinin əsas elementlərinin təşəbbüskarı kimi bölgədə sülh və sabitliyin bərqərar edilməsində maraqlı tərəf olduğunu, Bakı ilə İrəvan arasında sülh sazişinin razılaşdırılması üçün şərait yarandığını vurğulayıb. XİN başçısı qeyd edib ki, Azərbaycan Ermənistanla ikitərəfli əsasda sərhədin delimitasiyası üzrə danışıqların intensivləşməsinin tərəfdarıdır (sonuncu görüş noyabrın 30-da keçirilib – İF).
“Görüşdə, həmçinin qarşılıqlı maraq doğuran digər məsələlər ətrafında da fikir mübadiləsi aparılıb”, - deyə nazirlikdən bildirilib.*
R.Kərimov