Rusiya münasibətləri normallaşdırmaq və sülh müqaviləsi bağlamaq niyyətini təsdiqləyən Azərbaycan və Ermənistanın birgə bəyanatını alqışlayır. Bu barədə RF XİN-in rəsmi nümayəndəsi Mariya Zaxarova bəyan edib.
«Moskvada Azərbaycan Respublikası Prezidenti Administrasiyasının və Ermənistan Respublikası Baş Naziri Aparatının iki ölkə arasında münasibətləri normallaşdırmaq və sülh müqaviləsi bağlamaq üçün qarşılıqlı niyyətini təsdiqləyən birgə bəyanatı məmnunluqla qarşılanıb», - Zaxarovanın Rusiya Xarici İşlər Nazirliyinin saytında dərc olunmuş şərhində deyilir.
Vurğulanır ki, Rusiya həmçinin Bakı və İrəvan arasında Ermənistan və Azərbaycan hərbçilərinin azad edilməsi ilə bağlı razılaşmanı alqışlayır.
«Nəqliyyat kommunikasiyalarının açılması, sərhədin delimitasiyası, sülh müqaviləsinin bağlanması və vətəndaş cəmiyyəti xətti ilə təmaslarda bundan sonra da istənilən köməyi göstərməyə hazırıq», - məlumatda qeyd olunur. **