Azərbaycan sülh müqaviləsi ilə bağlı sonuncu təkliflərə cavabını Ermənistana təqdim edib. Bunu Azərbaycanın xarici işlər naziri Ceyhun Bayramov “AzTV”yə müsahibəsində deyib.
“Bir ay ərzində tərəfimizdən işlənmiş təkliflər paketi Ermənistana təqdim olunub”, - deyə nazir bildirib.
O əlavə edib ki, Ermənistanla danışıqlar prosesi davam edir. C.Bayramov qeyd edib ki, 2024-cü ildə tərəflər arasında görüşlər keçirilə bilər.
XİN rəhbəri vurğulayıb ki, Bakı son vaxtlar İrəvandan müsbət siqnallar alsa da, Ermənistandan sülh prosesi ilə bağlı real addımlar gözləyir.
“Biz sülh prosesinə real baxırıq. Eyni zamanda, başa düşməliyik ki, sülh müqaviləsi bütün məsələlərin 100% həlli demək deyil. Sülh müqaviləsi gələcək müzakirələrin əsasıdır. Bu, ən azından Azərbaycanla Ermənistan arasında normal qonşuluq münasibətlərinin əsasının qoyulması üçün şərtlərdir”, - deyə C.Bayramov əlavə edib.*
R.Kərimov