İsrail Misirlə Qəzza arasında sərhəd bağlanmaya qədər HƏMAS-a qarşı müharibəni bitmiş hesab etməyəcək. CNN xəbər verir ki, bunu İsrailin baş naziri Benyamin Netanyahu deyib.
“Biz HƏMAS-ı məhv edəcəyik, Qəzzanı silahsızlaşdıracağıq, lakin bu cənub keçidindən hərbi texnika və digər öldürücü silahlar daxil olmağa davam edəcək. Buna görə də biz onu bağlamalıyıq”, - deyə Netanyahu bildirib.
CNN izah edir ki, baş nazir 14 km uzunluğunda Filadelfiya dəhlizini – Misirlə Qəzza arasında sərhəddə bufer zona kimi yaradılmış quru zolağını nəzərdə tutub. İsrail iddia edir ki, blokada israillilərin HƏMAS-dan müdafiə olunması üçün mühüm əhəmiyyət kəsb edir.
Bundan əvvəl “The Wall Street Journal” məlumat yayıb ki, İsrail rəsmiləri Misiri Qəzza ilə sərhəddə hərbi əməliyyatın keçirilməsinin planlaşdırıldığı barədə məlumatlandırıblar.
İsrail, ilk növbədə, Filadelfiya dəhlizinə tam hərbi nəzarət etmək, bundan sonra Qəzza zolağına humanitar yardımın çatdırılmasında mühüm rol oynayan Rəfah nəzarət-buraxılış məntəqəsində fələstinli sərhədçiləri israilli sərhədçilərlə əvəz etmək niyyətindədir.
Misir Xarici İşlər Nazirliyinin nümayəndəsi Əhməd Əbu Zeyd Netanyahunun Misirlə Qəzza arasında sərhədin bağlanması çağırışına cavab olaraq bildirib ki, Qahirə öz sərhədlərinə tam nəzarət edir və bu məsələlər iştirakçı ölkələr arasında təhlükəsizlik haqqında sazişlər və hüquqi sazişlərlə tənzimlənir. Buna görə də bu məsələrlə bağlı istənilən danışıqlar bir qayda olaraq əvvəlcə diqqətlə öyrənilir və daha sonra mövqelər açıqlanır.*