Azərbaycan 2023-cü ilin yanvar-noyabr aylarının yekunları üzrə İtaliyaya neftin ən iri tədarükçüsü statusunu qoruyub.
“İnterfaks-Azərbaycan” agentliyi İtaliyanın Ətraf Mühit və Enerji Təhlükəsizliyi Nazirliyinin məlumatına istinadən xəbər verir ki, yanvar-noyabr aylarında Azərbaycan İtaliyaya 10,2 milyon ton neft tədarük edib ki, bu da ötən ilin müvafiq dövrünün göstəricisindən 24,4% çoxdur.
Hesabat dövründə İtaliya “Azeri Light” markalı neftin idxalını 24,5% - illik hesablamada 6,8 milyon tona qədər, “Azeri Blend” markalı neftin idxalını isə 24,2% - ildən ilə 3,4 milyon tona qədər artırıb.
Yanvar-noyabr aylarında İtaliyaya neft idxalı 2022-ci ilin eyni dövrü ilə müqayisədə 3,1% azalaraq 55,3 milyon ton təşkil edib. Beləliklə, ötən ilin 11 ay ərzində İtaliyaya neft tədarükündə Azərbaycanın payı 18,4% təşkil edib.
Hesabat dövründə İtaliyaya neftin əsas tədarükçülərinin beşliyinə Azərbaycan (10,2 milyon ton), Liviya (9,4 milyon ton), ABŞ (6,9 milyon ton), İraq (6,4 milyon ton) və Qazaxıstan (6 milyon ton) daxil olub.
Rusiya 2023-cü ilin yanvar-noyabr aylarında İtaliyaya neft tədarük etməyib.
2023-cü ilin noyabr ayında Azərbaycandan İtaliyaya neft tədarükü illik hesablamada 26,9% - 551 min tona qədər artıb. İtaliya 2022-ci ilin noyabr ayı ilə müqayisədə “Azeri Light” markalı neftin idxalını 2 dəfə - 175 min tona qədər, “Azeri Blend” markalı neftin idxalını 4,2 dəfə - 376 min tona qədər artırıb.
Noyabrda İtaliyaya neft idxalı 2022-ci ilin eyni dövrü ilə müqayisədə 13,6% azalaraq 4,2 milyon ton təşkil edib. Bununla da noyabr ayında İtaliyaya neft tədarükündə Azərbaycanın payı 13,1% təşkil edib.
Noyabrda İtaliyaya neftin əsas tədarükçülərinin üçlüyünə Liviya (746 min ton), Azərbaycan (551 min ton) və Qazaxıstan (528 min ton) daxil olub.
Yanvar-noyabr aylarında “Azeri Light” markalı neftin bir bareli $89,23-ə (ildən ilə azalma 17,9%), “Azeri Blend” markalı neftin bir bareli $87,12-yə (azalma 23,5%), Qazaxıstanın “CPC Blend” və “KEBCO” markalı nefti isə müvafiq olaraq $82,59 və $85,1-ə alınıb.
Yanvar-noyabr aylarında İtaliya üçün bir barel neftin orta idxal qiyməti $85,75 (ildən ilə azalma 15,4%) təşkil edib. Ən bahalı neft növü “Qua Iboe” (N.LIGHT. BBQ) ($105,17), ən ucuz neft növü isə “Bravo” ($70,29) olub.
2023-cü ilin noyabr ayında “Azeri Light” markalı neftin bir bareli $89,33-ə (ildən ilə azalma 6,6%), “Azeri Blend” markalı neftin bir bareli $87,81-ə (ildən ilə azalma 13,2%), Qazaxıstanın “CPC Blend” və “KEBCO” markalı nefti isə müvafiq olaraq $84,9 və $91,28-ə alınıb.
Noyabrda İtaliya üçün bir barel neftin orta idxal qiyməti $88,32 (ildən ilə azalma 1,6%) təşkil edib. Ən bahalı neft növü “Qua Iboe” (N.LIGHT. BBQ) ($97,91), ən ucuz neft növü isə “Okwuibome” nefti ($78,87) olub.**
R.Kərimov