2024-cü ildə Azərbaycan ərzaqlıq (toyuq) yumurta ixracını 100 milyon ədədə qədər artıracaq. Bu barədə Azərbaycan Quş Əti, Yumurta İstehsalçıları və İxracatçıları Assosiasiyası (APEPEA) qeyd edir.
Aqrar Sığorta Fondu (ASF) və APEPEA-nın rəhbərliyi arasında görüş keçirilib, quşçuluq təsərrüfatlarının sığortalanması məsələləri müzakirə olunub.
“İnterfaks-Azərbaycan” ASF-nin məlumatına istinadən xəbər verir ki, Fond artıq quşçuluq təsərrüfatlarının sığortası ilə bağlı araşdırmalar və ilkin hesablamalar aparır.
Görüşdə qeyd olunub ki, 50-dən artıq quşçuluq təsərrüfatı və müəssisələrini özündə birləşdirən APEPEA-da hazırda ölkənin quşçuluq və broyler təsərrüfatlarında 40 min nəfərə yaxın işçi çalışır.
APEPEA-nın məlumatına əsasən, Azərbaycanda gündə 4-4,5 milyon ədəd, ümumilikdə ildə 2 milyard ədədə yaxın yumurta istehsal edilir. İstehsal olunan yumurtanın bir hissəsi xarici ölkələrə ixrac edilir. Xüsusilə, 2023-cü ildə 60 milyon ədəd yumurta ixrac edilib, 2024-cü ildə isə bu rəqəmin 100 milyona çatacağı gözlənilir.
Hazırda Azərbaycandan yumurta məhsulları Rusiya və Birləşmiş Ərəb Əmirliklərinə ixrac olunur, eləcə də Avropa ölkələrinə ixrac barədə razılaşmalar mövcuddur.**
B.Rüstəmbəyov