2024-cü il fevralın 7-də Azərbaycanda keçirilmiş prezident seçkilərinin nəticələri ölkə əhalisinin hazırkı Prezident İlham Əliyevi qeyd-şərtsiz dəstəklədiyini təsdiqləyir. Bunu Rusiyanın Azərbaycandakı səfiri Mixail Yevdokimov deyib.
“Nəticələr tamamilə proqnozlaşdırıla biləndir. 2018-ci ildə keçirilmiş əvvəlki seçkilərdə İlham Əliyev 86% səs toplamışdı və Qarabağa nəzarəti və ölkənin ərazi bütövlüyünü bərpa etdikdən sonra məsələn, mən əmin idim ki, o, 90%-dən çox səs toplayacaq. Lakin nəticələrin çox yaxşı olacağı tamamilə hamıya aydın idi. Buna görə 92% proqnozlaşdırıla bilən nəticədir. Bu isə Azərbaycan Prezidentinin ölkə əhalisi tərəfindən qeyd-şərtsiz dəstəklənməsinin təsdiqidir. Bu, Azərbaycanda həm rəsmilərlə, həm də sadə Azərbaycan vətəndaşları ilə söhbətdə öz əksini tapır”, - deyə Yevdokimov “İzvestiya” nəşrinə müsahibəsində bildirib.
Səfirin sözlərinə görə, Rusiya-Azərbaycan ikitərəfli əlaqələrinin inkişafı iki prezident - Vladimir Putin və İlham Əliyev arasında çoxillik hörmətə əsaslanan münasibətlər üzərində qurulub. “Bizim dialoqumuz hansısa konyunktur dəyişikliklərə məruz qalmır, münasibətlər yüksələn xətlə inkişaf edir, ona görə də biz Azərbaycanda prezident seçkilərinin hansısa dəyişikliklərə gətirib çıxaracağını gözləmirdik və gözləmirik. Biz sadəcə olaraq indi etdiyimiz kimi səmərəli və intensiv şəkildə işləməyə çalışacağıq”,- deyə diplomat əlavə edib.
Mərkəzi Seçki Komissiyasının məlumatına görə, hazırkı Prezident İlham Əliyev növbədənkənar prezident seçkilərində 92,12% səs toplayıb.*
Xəbərlər şöbəsi