2023-cü ildə “Azəri-Çıraq-Günəşli” (AÇG) blokundan neft hasilatı 137 istismar quyusundan həyata keçirilib. Bu barədə “İnterfaks-Azərbaycan” agentliyinə BP şirkətinin (“Azəri-Çıraq-Günəşli” yataqlar blokunun işlənməsi üzrə operator) mətbuat xidmətindən məlumat verilib.
“2023-cü il ərzində müqavilə blokunda 8 hasilat, 6 su injektor və 1 qaz injektor quyusu qazılıb. 2023-cü ilin sonuna olan vəziyyətə görə, 137 neft hasilat quyusu, 45 su injektor və 8 qaz injektor quyusu istismarda olub”, - şirkətdən bildirilir.
bp şirkətinin məlumatına əsasən, AÇG blokunun işlənməyə başlandığı dövrdən etibarən ümumilikdə 4,3 milyard bareldən çox neft hasil edilib.
BP şirkətinin Azərbaycan, Gürcüstan və Türkiyə regionunda quyular üzrə vitse-prezidenti Cim O’Liri bəyan edib ki, 2024-cü ildə AÇG blokunda 18 quyunun, o cümlədən 12 hasilat, 3 su injektor, 2 qaz injektor və “deep-gas” layihəsi çərçivəsində 1 quyunun qazılması planlaşdırılır
Xəbər verildiyi kimi, 2023-cü ildə AÇG blokundan 133 milyon barelə yaxın neft (18 milyon ton) hasil edilib, bu da 2022-ci ilin yanvar ayının barrel ilə göstəricisindən 12,5% azdır. 2023-cü ildə bu müqavilə sahəsindən orta sutkalıq neft hasilatı 363 min barel (2022-ci ildə 415,4 min barel) təşkil edib.
“Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və elə həmin ilin dekabrın 12-də qüvvəyə minib. Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun işlənməsi haqqında 2050-ci ilədək olan dövrü əhatə edən yeni müqavilə imzalanıb.
Yeni müqavilə üzrə BP (Britaniya - layihənin operatoru) 30,37%, SOCAR 25%, MOL (Macarıstan) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, “ITOCHU Oil” (Yaponiya) 3,65%, “Equinor” (Norveç) 7,27%, TPAO (Türkiyə) 5,73% pay sahibidir. 2023-cü ilin dekabr ayında SOCAR tərəfindən BTC layihəsi üzrə “Equinor” şirkətinə məxsus iştirak payının alınmasına dair saziş imzalanıb. İştirak payının alınmasına dair əqd tərəflərin bir sıra öhdəlikləri yerinə yetirməsindən sonra başa çatmış hesab olunacaq.**
N.Abbasova