Rusiya 2024-cü ilin noyabrında Azərbaycanda keçiriləcək BMT-nin İqlim Konfransı COP-29-a hazırlaşır. Bu barədə RF-nin iqtisadi inkişafı naziri Maksim Reşetnikov bəyan edib.
Reşetnikov Rusiya Sənayeçilər və Sahibkarlar İttifaqının (RSSİ) Rusiya Biznes Həftəsi çərçivəsində keçirilən İqlim Forumunda sessiya zamanı bildirib ki, mədən yanacağının gələcəyi ilə bağlı artıq əldə edilmiş razılaşmaların yenidən nəzərdən keçirilməsinin qarşısını almaq, «ədalətli enerji keçidi» məntiqinə əməl etmək vacibdir.
"Bu il COP29 İqlim Konfransında iştirakçı ölkələr ötən ilin razılaşmalarının həyata keçirilməsi ilə bağlı konkret qərarların siyahısı olan “Missiyanın 1,5 dərəcə Yol xəritəsi"ni hazırlamalıdırlar. Bu Yol xəritəsinin təkcə şüarlar toplusu kimi deyil, konkret qərarlar toplusu kimi qəbul edilməsi vacibdir ki, hər ölkə öz iqtisadiyyatına tətbiq olunan hər bir qərarın nəticələrini başa düşsün", - o bildirib.
Onun sözlərinə görə, Rusiyanın qarşıdakı İqlim Konfransında prioritetlərindən biri maliyyə gündəmi olacaq.
Reşetnikov vurğulayıb ki, əsas məsələ «ədalətli enerji keçidi» məntiqinə əməl etməkdir. Ən böyük tullantılar ənənəvi enerjiyə təsadüf edir. Enerji təhlükəsizliyinin təmin edilməsi məqsədilə mədən yanacağı sektoruna investisiya cəlb etmək imkanı olmalıdır.
"Karbon vahidlərinin transsərhəd ticarətinin inkişafı ilə bağlı təkliflərimizi gələcəkdə irəli sürəcəyik. Başa düşürük ki, dünya gündəliyində sıfır balans yalnız tullantıların azaldılması hesabına əlçatan deyil. Udulmalarla işləmək və bunun üçün lazımi infrastrukturun yaradılması zəruridir. Bu standartların birləşməsidir, iqlim treki üzrə bütün işlərin nəzərə alınması üçün vahid sistemin yaradılmasıdır. Karbon vahidləri ilə transsərhəd ticarətin yaradılması ilə bağlı təkliflərimizi irəli sürəcəyik. Bu, birgə iqlim layihələrinin həyata keçirilməsi və onlara investisiya cəlb edilməsi üçün əlavə imkanlardır", - nazir vurğulayıb. **
R.Əhmədov