Azərbaycan prezidenti İlham Əliyev bəyan edib ki, ölkəmiz qaz ixracı coğrafiyasını, həmçinin Avropa istiqamətində genişləndirəcək.
«Biz artıq səkkiz ölkəyə təbii qaz ixrac edirik. Tələbat daha böyükdür, ilk növbədə, təbii ki, Avropa İttifaqı məkanından.Gələcəkdə bizim ixrac coğrafiyamız artacaq, təbii ki, Avropa istiqaməti üzrə. Bu yaxınlarda bizim yeni resurs bazamız işə salınıb. “Şahdəniz” yatağından sonra ikinci resurs bazamız “Abşeron” qaz-kondensat yatağından ilk qaz çıxarılıb və yəqin ki, biz yaxın gələcəkdə bu yatağın işlənilməsinin ikinci mərhələsinə də başlayacağıq”, - Əliyev çərşənbə günü inaqurasiya mərasimində nitqində bildirib.
Onun sözlərinə görə, 2025-ci ildə“Azəri-Çıraq-Günəşli” yatağının dərin laylarından qaz hasilatı nəzərdə tutulur.“Bu da bizim resurs bazamızı artıracaq. Ondan başqa, “Ümid”, “Babək”, “Şəfəq”, “Asiman”, “Qarabağ” neft və qaz-kondensat yataqlarından hasilata başlamaq üçün bir çox xarici investorlar tərəfindən təkliflər var. Vaxtilə bizi istəməyən qüvvələr şayiə yayırdılar ki, Azərbaycanda neft yoxdur. Azərbaycan 1997-ci ildən bəri neft hasilatını yüksək səviyyədə saxlayır və bir çox ölkələrə neft ixrac edir. Sonra deyirdilər ki, Azərbaycanda qaz yoxdur. Təbii ki, bu da cəfəngiyatdır, bax, sadaladığım bu yataqlar onu əyani şəkildə göstərir”, - dövlət başçısı əlavə edib.
Xəbər verildiyi kimi, 2023-cü ildə Azərbaycan üzrə təbii qaz ixracı 2022-ci illə müqayisədə 6,9% artaraq 23 milyard 856 milyon 355,587 min kubmetr olub. Həmçinin, Avropaya 11,8 milyard kubmetr qaz nəql olunub.
Azərbaycan “Şahdəniz” yatağından hasil edilən qazın Gürcüstan, Türkiyə və Avropanın 6 ölkəsinə (İtaliya, Yunanıstan, Bolqarıstan, Rumıniya, Macarıstan, Serbiya) ixracına dair müqavilələr bağlayıb. **
N.Abbasova