Sentyabrin 20-22-də “Təhsil və Karyera” Beynəlxalq sərgidə iştirak edən bütün xarici ali məktəblər tələbələri qanuni olaraq qəbul edir. Bu barədə təhsil nazirinin müavini Qulu Novruzov məlumat verib.

“Çox sayda xarici vətəndaşlar Azərbaycanda təhsil alır. Niyə bizim vətəndaşlarımız xaricdə təhsil almaq hüququndan məhrum edilməlidir? Burada pis nə var?”, - deyə Q.Novruzov çərşənbə günü “Təhsil və Karyera” VI Beynəlxalq sərginin keçirilməsinə həsr olunan mətbuat konfransında TQDK sədri Məleykə Abbaszadənin Azərbaycan vətəndaşlarının xarici ali məktəblərə qanunsuz qəbulu ilə bağlı fikirə dair suala cavab verərkən bildirib.

Onun sözlərinə görə, təmsil etdiyi idarə həmçinin Azərbaycan tələbələrinin xarici dövlətlərin ali məktəblərinə qanunsuz qəbulu problemindən narahatdır. “Hər bir dövlətin tələbələrin ali məktəblərə qəbuluna dair öz tələb və şərtləri mövcuddur. Biz bu məsələyə qarışmaq iqtidarında deyilik. Hər bir şəxs təhsil almaq üçün seçim etmək hüququna malikdir”, - deyə nazir müavini əlavə edib.

Diplomların tanınması məsələsinə toxunan Q.Novruzov bildirib ki, diplomların tanınmasına dair ali məktəblər arasında xüsusi razılıq mövcud deyil. Beynəlxalq konvensiya mövcuddur ki, buna əsasən həmin konvensiyaya qoşulan dövlətlərin ərazisində bütün ali məktəblərin diplomları tanınır.

“Həmin konvensiyada ali məktəblərə iki əsas tələb əks olunub: akkreditasiyanın olması və həmçinin bu və ya digər ali məktəbdə təhsil aldıqdan sonra diplomun verilməsi”, - deyə o qeyd edib.