Azərbaycan və Sloveniya “Qarşılıqlı investisiyaların qorunması və təşviqi haqqında” sazişin imzalanmasını sürətləndirəcək. Azərbaycanın iqtisadi inkişaf naziri Şahin Mustafayev çərşənbə günü belə bildirib.

“Son illər Azərbaycan və Sloveniya arasında iqtisadi əlaqələr genişlənir. Biz “Qarşlığlı investisiyaların təşviqi və müdafiəsi haqqında” sazişin imzalanması prosesini sürətləndirmək qərarına gəlmişik. Bu iş adamları üçün çox vacib sənəddir”,- deyə Ş.Mustafayev Bakıda keçirilən Azərbaycan-Sloveniya işgüzar görüşündə bildirib.

Bununla yanaşı, nazir qeyd edib ki, Azərbaycan və Sloveniya arasında cari mal dövriyyəsi çox aşağı səviyyədədir və mövzud potensiala uyğun gəlmir.

“Azərbaycan Sloveniya ilə tikinti, turizm,infrastrukturun yaradılması, İKT sahələrində əməkdaşlığın genişləndirilməsində maraqlıdır”.- deyə Ş.Mustafayev əlavə edib.

Sloveniyanın baş nazirinin müavini, iqtisadi inkişaf və texnologiya naziri Radovan Zerjav öz növbəsində qeyd edib ki, Azərbaycan və Sloveniya iki ölkənin iç adamlarının fəaliyyət göstərməsi üçün şərtləri yaxşılaşdırmaq istəyir.

“Biz hidroenergetika, alternativ enerji, avtomobil yollarının tikintisi sahələrində əməkdaşlıq məsələlərini müzakirə etdik.Bundan başqa, bəzi layihələr var ki, onların reallaşdırılması üçün Azərbaycan investisiyalarının cəlb edilməsində maraqlıyıq”,- deyə o qeyd edib.

Azərbaycanda İxracın və İnvestisiyaların Təşviqi Fondunun (Azpromo) rəhbəri Rüfət Məmmədov bildirib ki, Azərbaycan və Sloveniya arasında perspektivli sahələrdən biri turizm sahəsidir. O əlavə edib ki, gələcəkdə Sloveniyada Azpromonun nümayəndəliyi açıla bilər.