Mançester Azərbaycan Cəmiyyəti Böyük Britaniyanın Mançester Universitetində Azərbaycan musiqisi gecəsi keçirib. Bu barədə Bakı şəhər Mədəniyyət və Turizm İdarəsindən məlumat verilib.

Gecəyə dəvət edilən Mançester Universitetinin tələbələri Azərbaycanın milli musiqisi, rəqsləri ilə tanış olmaq imkanı əldə ediblər. Tədbirin başlanğıcında iştirakçılara Azərbaycan musiqisi-xalq mahnıları, görkəmli bəstəkarlar və musiqi alətləri haqqında məlumat verilib.

Şərqdə ilk operanın dünya şöhrətli bəstəkar Üzeyir Hacıbəyli tərəfindən yazılması, həmçinin Şərqdə opera bəstələyən və ifa edən ilk qadının azərbaycanlı olması barədə məlumatlar qonaqların daha böyük marağına səbəb olub.

Sonra Azərbaycanın milli musiqiləri Mançester, Şeffild, Oxford və Belfast şəhərlərində təhsil alan azərbaycanlı tələbələr tərəfindən gitara, tar, nağara, saz və digər alətlərdə ifa edilib.

O cümlədən, Mançester Azərbaycan Cəmiyyətinin üzvləri tərəfindən “Mirzeyi”, “Naz eləmə” və digər milli rəqslər təqdim edilib.

Bundan başqa, tədbirdə müxtəlif interaktiv yarışlar keçirilib, qaliblərə Azərbaycan ilə bağlı hədiyyələr verilib.