Dövlət Sosial Müdafiə Fondu (DSMF) avqust ayı üzrə əmək pensiyalarının maliyyələşdirilməsini vaxtından əvvəl başa çatdırıb (vəsaitlərin fondun regional şöbələrinin hesablarına köçürülməsini - İF-Az). Bu barədə DSMF-in məlumatında deyilir.

DSMF-in mərkəzi xəzinə hesabından pensiyaların maliyyələşdirilməsi üçün tələb olunan vəsaitin yerli orqanların hesablarına köçürülməsi avqust ayının 21-də tam yekunlaşıb”,- deyə məlumatda bildirilir.

Ümumilikdə bu ilin yanvar-iyul ayları ərzində fondun gəlirləri 1 mlrd. 660 mln. manat təşkil edib ki, bu da ötən ilin müvafiq dövrünə nisbətən 8,2% və ya 125,6 mln. manat çoxdur.

Məcburi dövlət sosial sığorta haqları üzrə daxilolmalar əvvəlki ilin müvafiq dövrünə nisbətən 10,2% artaraq 975,7 mln. manata (artım 10,2%) çatıb.

Bu daxilolmaların 622 mln. manatı qeyri-büdcə sektorunun payına düşüb ki, bu da əvvəlki ilin müvafiq dövrünə nisbətən 12,6% çoxdur.

2014-cü ilin 7 ayı ərzində fondun xərcləri 1 mlrd. 658,8 mln. manat olub və bunun 98,2%-i pensiya və müavinətlərin maliyyələşdirilməsinə yönəldilib.

2014-cü ilin 1 iyul tarixinə Azərbaycanda əmək pensiyası alan şəxslərin sayı 1 mln. 284,974 min nəfər təşkil edib. Onların 61,1%-ni yaşa görə, 28,1%-ni əlilliyə görə, 10,8%-ni isə ailə başçısını itirməyə görə əmək pensiyası alanlar təşkil edib.

2014-cü il iyulun 1-nə Azərbaycanda pensiyaların orta həcmi 172,2 manata bərabərdir.