IBM-in ofisinin Azərbaycanda açılması və fəaliyyət göstərməsi ölkənin İKT sektoruna xarici investisiyaların cəlb edilməsi üzrə milli strategiyanın keçirilməsinə yardımçı olacaq. Bu barədə rabitə və yüksək texnologiyalar nazirinin müavini Elmir Vəlizadə cümə axşamı İBM Korporasiyasının Bakıda ofisinin açılmasına həsr olunan mətbuat konfransında bəyan edib.

“İBM şirkəti 100 ildən çoxdur İKT sahəsində fəaliyyət göstərir və Cənubi Qafqazda məhz Azərbaycanda ilk ofisin açılması bizim üçün əlamətdar hadisədir. İBM-in malik olduğu təcrübəni nəzərə alaraq, düşünürəm ki, şirkət ölkənin İKT sektorunun inkişafına töhfə verəcək”, - deyə nazir müavini vurğulayıb.

Onun sözlərinə görə, respublikada formalaşan biznes mühit, mövcud kadr potensialı və siyasi dəstək İBM ilə uğurlu əməkdaşlıq üçün şərait yaradır. “Düşünürəm ki, şirkət həm elektron hökumətin formalaşması, həm də ölkədə data mərkəzlərin fəaliyyətinin təşkilinə töhfə verəcək”, - deyə E.Vəlizadə qeyd edib.

IBM-in inkişaf etməkdə olan ölkələr üzrə baş direktoru Eray Yüksək bildirib ki, bu regionda fəaliyyətin genişlənməsi şirkətin bütün dünyada inkişaf edən bazarlarda qabaqcıl həll və xidmətlərin təklif edilməsi ilə mövqelərinin möhkəmləndirilməsi təşəbbüsünə uyğun həyata keçirilir.

Ofis müştərilərə bulud texnologiyaları, analitika, mobil və sosial texnologiyaların mənimsənilməsi ilə bağlı xidmətlər göstərəcək.

IBM-in Azərbaycan üzrə baş direktoru İlya Kravtsov, öz növbəsində qeyd edib ki, karbohidrogen ehtiyatlarının hasilatının artımına yönələn həllər təklif etməyə hazırdır. “Bundan başqa, neftin qiymətinin ucuzlaşması və milli valyutanın devalvasiyası xərclərin optimallaşmasını tələb edir və İBM bu məsələnin həllində öz qərarlarını təklif etməyə hazırdır”, - deyə o vurğulayıb.

İ.Kravtsov qeyd edib ki, İBM üçün Azərbaycanda dövlət sektoru, bank sektoru ilə əməkdaşlıq və həllərin təşviqi prioritet təşkil edir.

N.Abbasova