Azərbaycan şirkətləri "X5 Retail Group"la meyvə-tərəvəz məhsullarının Rusiya bazarına tədarükü barədə razılığa gəlib.

"Azərbaycanda İxracın və İnvestisiyaların Təşviqi Fondunun (AZPROMO) dəvəti ilə Bakıya gələn Rusiyanın böyük marketlər şəbəkəsinə malik olan “X5 Retail Group” şirkətinin rəhbər heyəti sentyabrın 8-də 10-dan çox yerli şirkət təmsilçiləri və sahibkarlarla görüşüb", - deyə AZPROMO-nun saytında məlumat verilir.

Görüşdə "Azərbaycan Meyvə və Tərəvəz İstehsalçıları və İxracatçıları Assosiasiyası"na üzv olan şirkətlərlə qarşılıqlı faydalı fəaliyyət istiqamətləri müzakirə olunub, meyvə-tərəvəz məhsullarının “X5 Retail Group”la əməkdaşlıq çərçivəsində Rusiya bazarına birbaşa ixrac olunması qərara alınıb.

AZPROMO İqtisadi İnkişaf Nazirliyi tərəfindən 2003-cü ildə yaradılıb. İlkin mərhələdə fond investisiyaların təşviqi və investisiya məsələləri üzrə məsləhətləşmələrlə məşğul olurdu. 2005-ci ilin avqust ayında fondun funksiyaları genişləndirilib və fond ixracın təşviqi məsələləri ilə məşğul olmağa başlayıb.*

A.Əzizov