Gələn həftə Bakıda Azərbaycan-Meksika siyasi məsləhətləşmələrin ikinci mərhələsi keçiriləcək. Bu barədə Meksikanın Bakıdakı səfiri Rodriqo Labardini bəyan edib.

“Gələn həftə Bakıda Azərbaycan-Meksika münasibətlərin inkişafı məqsədilə siyasi məsləhətləşmələrin ikinci mərhələsi keçiriləcək”, - deyə səfir cümə axşamı Meksikanın Müstəqillik Gününə həsr olunan tədbirdə çıxşında bildirib.

Onun sözlərinə görə, Meksika Azərbaycanla iqtisadi əlaqələrin genişləndirilməsində maraqlıdır. “Cari ilin noyabr ayında azərbaycanlı sahibkarlar iqtisadi əlaqələrin qurulması məqsədilə Meksikaya səfər edəcəklər”, - deyə o qeyd edib.

R.Labardini əlavə edib ki, Meksika BMT-nin Dağlıq Qarabağa dair qətnamələrinin icrasına çağırır. “Biz Azərbaycanın suverenliyi və ərazi bütövlüyünü aydın şəkildə əks etdirən BMT-nin Dağlıq Qarabağa dair qətnamələrinin icra olunmasına çağırırıq”, - deyə səfir vurğulayıb. **

F.İsazadə