SOCAR (Azərbaycan Dövlət Neft Şirkəti, ARDNŞ) 2017-ci ilin birinci rübündə Ceyhan terminalından 3 mln. 906,969 min ton Azərbaycan nefti yola salıb. Bu barədə “İnterfaks-Azərbaycan” agentliyinə SOCAR-ın mətbuat xidmətindən məlumat verilib.

Xəbər verildiyi kimi, 2016-cı ilin birinci rübündə şirkət Ceyhan terminalından 4 mln. 628,741 min ton Azərbaycan nefti yola salıb. Beləliklə, 2017-ci ilin müvafiq dövründə neft nəqlinin həcmi 15,6% azalıb.

Mart ayında bu terminaldan yola salınmış neftin həcmi 1 mln. 185,458 min ton təşkil edib.

Cari ilin mart ayında dünya bazarında “Brent” markalı neftin bir bareli 51,57 ABŞ dollarına, “Urals” markalı neftin bir bareli 50,20 ABŞ dollarına, “BTC FOB Ceyhan” markalı neftin bir bareli 52,63 ABŞ dollarına satılıb.

2016-cı ildə bu terminaldan yola salınmış neftin həcmi 16 mln. 784,975 min ton təşkil edib.

BTC neft kəmərinin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Boru kəmərinin ötürmə qabiliyyəti ildə 50 mln. tondan çoxdur.

Layihənin iştirakçıları BP (30,1%); SOCAR (25%); “Chevron” (8,9%); “Statoil” (8,71%); TPAO (6,53%); ENI (5%); “Itochu” (3,4%); “ConocoPhillips” (2,5%); INPEX (2,5%); “Total” (5%) və ONGC (2,36%) şirkətləridir.**

N.Abbasova