2017-ci ilin sonuna kimi Azərbaycanda icbari tibbi sığortanın tətbiqi üçün qanunvericilik bazası hazırlanacaq. Bunu Nazirlər Kabineti yanında İcbari Tibbi Sığorta Agentliyinin direktoru Zaur Əliyev deyib.

“Qanunvericiliyə müvafiq dəyişikliklər artıq hazırlanıb. Onlar Prezident Administrasiyasına təqdim olunub. Düşünürəm ki, cari ilin sonuna kimi bu dəyişikliklər qəbul ediləcək”, - deyə Z.Əliyev “Caspian European Club” və “Caspian American Club”un biznes forumu çərçivəsində bildirib.

Onun sözlərinə görə, bundan sonra icbari tibbi sığorta haqqı, həmçinin dövlət tərəfindən ödəniləcək hissə barədə açıqlama veriləcək.

Z.Əliyev qeyd edib ki, fevral ayından etibarən Yevlax rayonu və Mingəçevir şəhərində icbari tibbi sığortanın tətbiqi üzrə pilot layihələr reallaşdırılır. “4 ayın nəticələri müsbətdir. Biz yerli əhalinin tibbi xidmətlərdən razı olduğunu şahidi oluruq, bu da xidmətlərdən istifadənin genişlənməsi ilə bağlıdır”, - deyə o vurğulayıb.

Z.Əliyev bildirib ki, pilot layihənin tətbiq olunduğu rayonlarda xəstəxanalarda çarpayıların dolması 45%-dən 80%-dək, poliklinikaya müracitələrin və əməliyyatların sayı artıb. “Tibb müəssisələri arasında rəqabət artıb. Maliyyə sistemi dəyişdiyinə görə, onlar pasiyentlərin sayının artımında maraqlıdır. Bundan başqa, bəzi tibb müəssisələrinin əməkdaşlarının maaşı artıb, bəzi hallarda hətta 3 dəfə. O cümlədən, bonuslar da müəyyənləşdirilib", - deyə Z.Əliyev vurğulayıb.

O qeyd edib ki, icbari tibbi sığortanın bütün ölkəni əhatə etməsi mərhələli şəkildə həyata keçiriləcək. “Biz qısa zamanda bütün ölkə ərazisində icbari tibbi sığortanın tətbiqinə yönəlmişik”, - deyə Z.Əliyev əlavə edib. **

A.Axundov