2020-ci ilin yekunları üzrə Azərbaycanın maliyyə sisteminin dərinliyi 45,9 milyard manat və ya ÜDM-nin 63%-ni təşkil edib. “İnterfaks-Azərbaycan” agentliyinin məlumatına görə, bu barədə hökumətin 2020-ci ilə dair hesabatında qeyd olunur.

2019-cu ilin yekunları üzrə Azərbaycanın maliyyə sisteminin dərinliyi ÜDM-nin 58,5%-ni təşkil edib.

“Ötən ilin yekunları üzrə Azərbaycanın maliyyə sisteminin aktivləri 45,9 milyard manat və ya ÜDM-nin 63%-i səviyyəsində (qeyri-neft ÜDM-nin 90%-i) qiymətləndirilir. Eyni zamanda, maliyyə sisteminin aktivlərinin 69,9%-i (2019-cu ilin yekunları üzrə 68,8%-i) bankların payına düşüb”, - deyə hesabatda bildirilir.

2020-ci ildə bankların aktivləri 2019-cu ilin göstəricisi ilə müqayisədə 2% azalıb.

Maliyyə sektorunun aktivlərinin strukturunda 27,1% bank olmayan kredit təşkilatlarının (BOKT) payına düşür.

Sığorta sektoru və investisiya şirkətlərinin maliyyə dərinliyinə töhfəsi cüzidir və müvafiq olaraq 2,9% və 0,1% təşkil edir.

2020-ci ilin sonuna Azərbaycanda 26 bank, 20 sığorta şirkəti, 10 investisiya şirkəti və 91 BOKT fəaliyyət üçün lisenziyaya malik olub.*

Ə.Məmmədov