Azərbaycan Mərkəzi Bankı 2023-cü il üçün cari əməliyyatlar hesabının profisitini enerji daşıyıcılarının qiymətləri hazırki səviyyəsində qalacağı halda ikirəqəmli səviyyədə proqnozlaşdırır.

“2023-cü ildə də cari əməliyyatlar hesabının profisitli olacağı ilə bağlı proqnoz dəyişməz qalır. Enerji daşıyıcılarının qiymətləri hazırki səviyyəsində qalarsa, növbəti ildə də cari hesab profisitinin ümumi daxili məhsula nisbətinin ikirəqəmli səviyyədə qalacağı gözlənilir”, - AMB-nin Faiz dəhlizinin parametrləri haqqında bəyanatında deyilir.

AMB qeyd edir ki, xarici ticarət balansının profisiti 10 ayda ötən ilin eyni dövrü ilə müqayisədə 3.1 dəfə artaraq 23.1 mlrd. ABŞ dollarına çatıb.

2022-ci ilin yanvar-sentyabr aylarında Azərbaycanın tədiyə balansının cari əməliyyatlar hesabının profisiti $17 milyard 710,6 milyon və ya ÜDM-in 30,7%-ni təşkil edib (2021-ci ilin 9 ayının göstəricisindən 4,5 dəfə çox).

Yanvar-sentyabr aylarında neft-qaz sektoru üzrə profisit $21 milyard 447,7 milyon (artım 2,6 dəfə), qeyri-neft sektoru üzrə kəsir $3 milyard 737,1 milyon (azalma 12,1%) təşkil edib.

2022-ci ilin yanvar-sentyabr aylarında bir barel neftin orta qiyməti $106,6 (2021-ci ilin müvafiq dövründə $61,9) təşkil edib.

AMB 2022-ci ilin yekunları üzrə Azərbaycanın tədiyə balansının cari əməliyyatlar hesabının profisitini ÜDM-in 23-25%-I səviyyəsində gözləyir.

2021-ci ildə Azərbaycanın tədiyə balansının cari əməliyyatlar hesabının profisiti $8 milyard 291,6 milyon və ya ÜDM-nin 15,2%-ni təşkil edib. Profisit neftin qiymətinin daha yüksək olması ilə şərtlənib (2021-ci ildə bir barel neftin orta qiyməti $66,8, 2020-ci ildə $40,8 təşkil edib). **

A.Əzizov