Özbəkistan Daxili İşlər Nazirliyinin (DİN) 31 minə yaxın əməkdaşı aprelin 30-da ölkə Konstitusiyasına dəyişikliklərlə bağlı qanun layihəsi üzrə referendumda təhlükəsizliyin təmin edilməsinə cəlb olunub. “İnterfaks-Azərbaycan” agentliyinin müxbirinin Daşkənddən verdiyi xəbərə görə, bu barədə DİN-in nümayəndəsi MSK-da keçirilən brifinqdə məlumat verib.

“Referendumda təhlükəsizliyin təmin edilməsi prosesinə DİN-in 30954 əməkdaşı, o cümlədən 550 nəqliyyat vasitəsi cəlb olunub”, - deyə o bildirib.

Nazirliyin əməkdaşı təhlükəsizliyin və ictimai asayişin təmin edilməsi üçün Özbəkistanın dövlət orqanları tərəfindən bütün lazımi tədbirlərin görüldüyünü vurğulayıb.

Bundan əlavə, bu gün referendum günü respublikanın hər yerində, ən mühüm obyektlərdə, o cümlədən hava limanlarında, dəmiryol vağzallarında və s. yerlərdə sutkalıq növbətçilik təşkil edilib.

DİN nümayəndəsi əlavə edib ki, “indiyə qədər səsvermə zamanı qanun pozuntuları ilə bağlı heç bir şikayət daxil olmayıb”.*

A.Əzizov