Azərbaycandan Avropaya Qara dənizin dibi ilə yaşıl enerji xəttinin inşası layihəsinin texniki-iqtisadi əsaslandırması (TİƏ) yaxın aylarda hazır olacaq. Bunu Prezident İlham Əliyev oktyabrın 8-də Tbilisidə Gürcüstanın baş naziri İrakli Qaribaşvili ilə mətbuata birgə bəyanatla çıxışı zamanı deyib.

“Azərbaycan və Gürcüstan yaşıl enerji dəhlizi layihəsi ilə bağlı Avropa ölkələri ilə sıx əməkdaşlıq edir. Bu layihənin texniki-iqtisadi əsaslandırması yaxın aylarda hazır olacaq”, - deyə o bildirib.

Əliyevin sözlərinə görə, TİƏ hazırlandıqdan sonra konkret işlərə start veriləcək. “Böyük sərmayə qoyuluşu (layihəyə - İF) nəzərdə tutulur. Beləliklə, yaşıl enerji dəhlizi, enerji kabeli inşa edilərək həm bizim, həm də tərəfdaş ölkələrin enerji təhlükəsizliyini gücləndirəcək”, - deyə dövlət başçısı əlavə edib.

Xəbər verildiyi kimi, 2022-ci il dekabrın 17-də Buxarestdə “Azərbaycan Respublikası, Gürcüstan, Rumıniya və Macarıstan hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında” saziş imzalanıb. Saziş Qafqaz regionundan Avropaya enerji körpüsünün inşasını nəzərdə tutur. Söhbət enerji ötürmə gücü 1000 MVt olan 1195 km uzunluğunda elektrik verilişi xəttinin tikintisindən gedir. Kabel Azərbaycanda istehsal edilən elektrik enerjisinin Gürcüstan və Qara dəniz vasitəsilə Rumıniyaya çatdırılaraq, Macarıstana və Avropanın qalan hissəsinə nəql edilməsi üçün nəzərdə tutulacaq.

Kabel 3-4 il ərzində çəkiləcək.

Avropa Komissiyası kabelin çəkilməsinə vəsait ayırmağı planlaşdırır. Bu, dünyada ən uzun kabel olacaq.*

A.Əzizov