Azərbaycan Prezidenti İlham Əliyev hesab edir ki, ölkə iqtisadiyyatı tədricən artım tempini bərpa edir.

“Bu ilin yanvar ayının nəticələri ümidvericidir.Ümumi daxili məhsul 5%, qeyri-neft sektorunda isə 12%-dən çox artıb. Bu, ümidverici göstəricidir və onu göstərir ki, biz indi yavaş-yavaş öz iqtisadi templərimizi bərpa edirik”, - Əliyev çərşənbə günü inaqurasiya mərasinində nitqində bildirib.

Onun sözlərinə görə, əgər 2003-cü ildə Azərbaycanda ÜDM-in nominal həcmi $7 milyard idisə, 2023-cü ilin yekunlarına görə isə bu rəqəm $72 milyard təşkil edib.

Əliyev vurğulayıb ki, uğurlu iqtisadi siyasət sosial siyasətdə də nailiyyətlər əldə etməyə imkan yaradıb. Xüsusilə, orta pensiya 500 manatdan çoxdur, orta əməkhaqqı 940 manatdır.“Əlbəttə ki, yenə də deyirəm, bu, bizi qane edə bilməz. Ancaq dinamika var, inkişaf var və ən önəmlisi, gözəl perspektivlər var. Bu gün iqtisadi sahədə aparılan islahatlar artıq Azərbaycanda tamamilə yeni bir investisiya iqlimi yaratmışdır. Əgər əvvəlki illərdə investisiyalar daha çox neft-qaz sahəsinə qoyulurdusa, bu gün qeyri-neft sektoruna qoyulan sərmayə milyardlarla dollar səviyyəsindədir. Əldə edilmiş razılaşmalar, imzalanmış kontraktlar yaxın bir neçə ildə özünü elə göstərəcək, sıçrayış elə böyük olacaq ki, bunu hər kəs görəcək”, - dövlət baçısı qeyd edib.

Prezdent əlavə edib ki, ölkə hökuməti yoxsulluq və işsizlik səviyyəsini azaltmaq üçün fəaliyyətini davam etdirəcək. “Müstəqillik dövründə əhalimiz 3 milyon artıb və artan əhalisi olan ölkələrdə işsizlik bir qayda olaraq ciddi problemdir, o cümlədən bizim üçün. Biz hər il 10 minlərlə yeni iş yeri yaratmalıyıq. Bunun üçün əlbəttə ki, daxili resurslar kifayət deyil. Xarici sərmayəyə ehtiyac var və iqtisadi islahatlar, o cümlədən biznes mühitinin yaxşılaşdırılması, rəqabətlə bağlı, inhisarçılığa qarşı olan tədbirlər bu biznes mühitini yaxşılaşdıracaq. Əlbəttə ki, Qarabağ və Şərqi Zəngəzur bizim iqtisadi inkişafımızın yeni bir dayaq nöqtəsi olacaqdır. O bölgələrdə həm kənd təsərrüfatı, həm bərpaolunan enerji ilə bağlı layihələr, turizm layihələri qeyri-neft sektoruna böyük dəstək verəcəkdir”, - Azərbaycan lideri vurğulayıb. **

R.Əhmədov