RF-nin baş naziri Vladimir Putin bəyan edir ki, onun Rusiya prezidenti Dmitri Medvedevlə effektiv əməkdaşlığı onların hər ikisi üçün ümumi prinsiplərlə şərtlənib.

"Bu ümumi prinsiplər bizə bu gün də effektiv işləməyə imkan verir", - deyə V.Putin cümə axşamı rusiyalılarla birbaşa ünsiyyət zamanı bildirib.

O, “Medvedev-Putin tandemində” qarşılıqlı münasibətlərin necə olması ilə bağlı suala belə cavab verib.

Baş nazir xatırladıb ki, D.Medvedevlə “çox-çox illərdir” tanışdır.

"Və nəinki tanışıq – biz birlikdə çox işləmişik, birlikdə bir universiteti bitirmişik, eyni müəllimlərdən dərs almışıq və onlar bizə təkcə bilik verməyiblər, həm də həyata münasibəti öyrədiblər", - deyə Putin bildirib.