Azərbaycan elektrik enerjisinin böyük istehsalçısı və ixracatçısı olmağı qarşısına vəzifə qoyur. Bunu Prezident İlham Əliyev deyib.

“Bildirməliyəm ki, bu ilin əvvəlindən energetika sahəsində çox önəmli addımlar atılıbdır. Yanvar ayında bu sahədə məşhur olan, Səudiyyə Ərəbistanını təmsil edən “ACWA Power” şirkəti ilə 240 meqavat gücündə Külək Elektrik Stansiyasının təməli qoyuldu. Fevral ayında “Azərenerji” tərəfindən inşa edilmiş 385 meqavat gücündə elektrik stansiyasının açılışı oldu və bu gün 230 meqavat gücündə günəş elektrik stansiyasının təməli qoyulur. Yəni hələ 3 ay tamamlanmayıb ki, artıq 855 meqavat gücündə yeni generasiya gücləri yaradılır, artıq 385 meqavat gücündə yaradılıbdır”, - deyə dövlət başçısı bu gün Qaradağ Günəş Elektrik Stansiyasının təməlqoyma mərasimində çıxışı zamanı bildirib.

O, əmin olduğunu bildirib ki, 2023-cü ildə əlavə güclər ümumi sistemə daxil ediləcək və bu, işin sadəcə olaraq başlanğıc hissəsidir. Çünki bərpaolunan enerji növlərinin inkişafı Azərbaycan üçün prioritet məsələdir.

“Azərbaycan nəinki xam neft, neft məhsulları və təbii qaz, eyni zamanda, elektrik enerjisinin böyük istehsalçısı və ixracatçısı olacaqdır. Onu da nəzərə almalıyıq ki, qonşu ölkələrdə və Avropa qitəsində elektrik enerjisinə böyük ehtiyac vardır. Biz elektrik enerjisini yalnız ekoloji cəhətdən təmiz mənbələrdən istehsal edirik - təbii qaz, su, günəş və külək. Azərbaycanda bərpaolunan enerji növlərinin potensialı həddindən artıq böyükdür. Məhz buna görə dünyanın aparıcı enerji şirkətləri indi Azərbaycanla bu sahədə əməkdaşlıq etməyə çox maraqlıdırlar. Əminəm ki, biz yaxın gələcəkdə yeni layihələrin başlanmasına start verəcəyik”, - deyə İ.Əliyev vurğulayıb.

Azərbaycan 2021-ci ildə rekord həcmdə - 1,7 milyard KVt/s-a yaxın elektrik enerjisi ixrac edib.

Azərbaycanın enerji sisteminin gücü təxminən 8 min MVt təşkil edir.*

B.Rüstəmbəyov