Rusiya, Ermənistan və Azərbaycan liderlərinin birgə bəyanatlarının bütün müddəalarının ardıcıllıqla yerinə yetirilməsi Bakı və İrəvan arasında sülh müqaviləsinin bağlanmasına imkan verəcək. Rusiya Prezidenti Vladimir Putin buna əmindir.

“Şübhəsiz, sülhə doğru yeganə mümkün və real yol Rusiya, Ermənistan və Azərbaycan liderlərinin məlum birgə bəyanatlarının bütün müddəalarına tərəflərin dönmədən riayət etməsi yolu ola bilər”, - deyə Putin Kollektiv Təhlükəsizlik Müqaviləsi Təşkilatının (KTMT) Kollektiv Təhlükəsizlik Şurasının bu gün keçirilən növbədənkənar iclasında bildirib.

O qeyd edib ki, Ermənistan-Azərbaycan sərhədinin delimitasiyası, nəqliyyat kommunikasiyalarının açılması, humanitar məsələlərin həlli yolunda bu razılaşmaların ardıcıl surətdə yerinə yetirilməsi hesabına Azərbaycan və Ermənistanın münasibətlərinin davamlı normallaşmasına nail olmaq mümkündür.*