Hazırda Azərbaycanın strateji valyuta ehtiyatları $67 milyard məbləğində qiymətləndirilir. Bunu baş nazir Əli Əsədov deyib.

“İlin əvvəlindən Azərbaycanın strateji valyuta ehtiyatları 14.5% artaraq $67 milyarda çatıb”, - deyə o, sentyabrın 23-də Azərbaycan Respublikasının 2024-cü il üzrə dövlət büdcəsinin müzakirəsinə həsr olunmuş Nazirlər Kabinetinin geniş iclasında bildirib.

“İnterfaks-Azərbaycan” agentliyinin qiymətləndirmələrinə görə, hazırda Azərbaycanın valyuta ehtiyatları rekord səviyyədədir.

Ölkədə mövcud makroiqtisadi vəziyyətə toxunan Ə.Əsədov diqqətə çatdırıb ki, dövlət başçısının hökumət qarşısında qoyduğu başlıca tapşırıqlardan biri də bu ilin sonuna qədər inflyasiyanın birrəqəmli səviyyəsinə nail olunmasıdır (2023-cü ilin 8 ayının yekunları üzrə 11,7% - İF).

Azərbaycanın strateji valyuta ehtiyatları Mərkəzi Bankın valyuta ehtiyatları, Dövlət Neft Fondunun aktivləri və Maliyyə Nazirliyinin xəzinə vəsaitlərindən formalaşır.*

R.Əhmədov