Rusiya Təhlükəsizlik Şurasının katibi Nikolay Patruşev Azərbaycan Prezident Administrasiyasının rəhbəri Ramiz Mehdiyevlə görüşündə beynəlxalq təhlükəsizlik məsələləri və Suriyadakı vəziyyəti müzakirə edib. Bu barədə “İnterfaks”a Şuranın mətbuat xidmətindən məlumat verilib.

“Görüşdə həmsöhbətlər beynəlxalq və regional təhlükəsizlik məsələləri, o cümlədən, Yaxın Şərq və Suriyadakı vəziyyəti müzakirə ediblər”, - deyə məlumatda deyilir.

N.Patruşev və R.Mehdiyev Bakıda danışıqlar zamanı təhlükəsizlik məsələləri üzrə məsləhətləşmələr aparıblar. Tərəflər vurğulayıblar ki, Rusiya ilə Azərbaycan arasında əlaqələr strateji tərəfdaşlıq xarakteri daşıyır.

Məlumatda qeyd olunur ki, N.Patruşev və R.Mehdiyev Rusiya və Azərbaycanın münasibətlərinin strateji tərəfdaşlıq xarakteri daşıdığını, ikitərəfli dialoqun qarşılıqlı və konstruktivlik üzərində qurulduğunu qeyd edib.

Bakıya səfərinin sonunda N.Patruşev Azərbaycan Dövlət Təhlükəsizlik Xidmətinin rəisi Mədət Quliyevlə görüşü zamanı iki ölkənin xüsusi xidmət orqanları arasında qarşılıqlı fəaliyyət məsələlərini müzakirə edib. **