Azərbaycanın xarici işlər naziri Elmar Məmmədyarov və İsveç Krallığının xarici işlər naziri Marqot Vallström iqtisadi əlaqələrin daha da inkişaf etdirilməsi ilə bağlı məsələləri müzakirə ediblər.

E.Məmmədyarov noyabrın 6-da İsveç Krallığına rəsmi səfəri çərçivəsində həmkarı M.Vallström ilə görüşüb.

“Görüşdə Azərbaycan və İsveç arasında iqtisadi əlaqələrin daha da inkişaf etdirilməsi yolları müzakirə edilib və bu xüsusda İsveç şirkətlərinin Azərbaycanda fəaliyyəti təqdir olunub, qarşılıqlı sərmayələrin artırılmasının vacibliyinə toxunulub. Tərəflər iki ölkə arasında iqtisadi-ticarət əlaqələrinin gücləndirilməsi, o cümlədən ticarət dövriyyəsinin artırılması üçün geniş potensialın olduğunu qeyd ediblər”, - deyə XİN-in məlumatında bildirilir.

Nazirlər Avropa İttifaqı ilə Azərbaycan arasında strateji tərəfdaşlığa dair saziş üzrə aparılan danışıqların hazırkı səviyyəsi ətrafında fikir mübadiləsi aparıblar və bu sazişin Avropa İttifaqı ilə Azərbaycan arasında əməkdaşlığın hərtərəfli inkişafına töhfə verəcəyinə inamlarını ifadə ediblər.

Elmar Məmmədyarov, həmçinin Azərbaycanın Avropa İttifaqının üzv ölkələri ilə qarşılıqlı hörmət və anlayışa əsaslanan əməkdaşlığın inkişaf etdirilməsinin tərəfdarı olduğunu bildirib və 10-a yaxın Aİ üzvü olan ölkə ilə ayrı-ayrılıqda strateji tərəfdaşlığa dair sazişin imzalandığına dair məlumat verib.*

F.İsazadə