Prezident İlham Əliyev sentyabrın 24-də İsveç Krallığının ölkəmizdə yeni təyin olunmuş fövqəladə və səlahiyyətli səfiri Kristian Kamillin etimadnaməsini qəbul edib. Bu barədə dövlət başçısının saytında məlumat verilir.

Görüşdə prezident İ.Əliyev İsveçin Avropa İttifaqı ilə regionumuz arasında daha geniş əməkdaşlıqla bağlı həmişə fəal olduğunu vurğulayıb.

“Avropa İttifaqı ilə Azərbaycan arasında indi çox yüksək səviyyəli tərəfdaşlıq mövcuddur və bu tərəfdaşlıq bir çox sahələri əhatə edir. Ümidvaram ki, yeni sazişlə bağlı danışıqlar uğurla davam edəcək. Əlbəttə ki, pandemiya ilə əlaqədar vəziyyət bizim planlarımıza müdaxilə etdi. Bizdə bir neçə ay davam edən karantin rejimi tətbiq olundu. Buna görə bizim heç bir fəal, fiziki təmaslarımız olmadı. Lakin faktiki olaraq əməkdaşlıq davam edir. Buna görə də əminəm ki, bizdə yeni əməkdaşlıq formatı olacaq”, - deyə İ.Əliyev bildirib.

O əlavə edib ki, Bakı Azərbaycanın ərazi bütövlüyü, suverenliyi və sərhədlərinin toxunulmazlığının Avropa İttifaqı tərəfindən dəstəklənməsini yüksək qiymətləndirir.

“Azərbaycan Avropa İttifaqına üzv olan ölkələrin üçdə biri ilə strateji tərəfdaşlıq üzrə sənədlər imzalayıb. Bu da əməkdaşlığın səviyyəsini nümayiş etdirir. İki il öncə biz tərəfdaşlığın prioritetləri üzrə sənədi də imzaladıq. Bu da bizim əməkdaşlığımızın gələcək inkişafı üçün çox mühüm əhəmiyyət kəsb edir. Biz çox məmnunuq ki, həmin sənəddə Azərbaycanın ərazi bütövlüyü, suverenliyi və sərhədlərimizin toxunulmazlığı Avropa İttifaqı tərəfindən dəstəklənib. Bu, Ermənistanla Azərbaycan arasında münaqişənin həllinə çox haqlı və ədalətli yanaşmanın olduqca mühüm əlamətidir”, - deyə dövlət başçısı vurğulayıb.

O, tezliklə Bakıya səfərə gələcək İsveç xarici işlər nazirini qəbul etməyi və əməkdaşlıqla bağlı geniş məsələləri müzakirə etməyi səbirsizliklə gözlədiyini diqqətə çatdırıb.

“İkitərəfli əlaqələrimizə gəlincə, əlbəttə ki, biz onların daha fəal olmasını görmək istəyirik. Mən əminəm ki, səfirlərin fəaliyyəti sayəsində bu imkan yaranacaq”, - deyə İ.Əliyev qeyd edib.

Səfir ikitərəfli əlaqələrin daha da güclənməsinə töhfə vermək üçün əlindən gələni əsirgəməyəcəyini deyib. O, İsveçin xarici işlər naziri Ann Lindenin gələn həftə Bakıya səfər edəcəyini bildirib.

K.Kamill İsveçin Azərbaycanla biznes əlaqələrinin inkişafında maraqlı olduğunu vurğulayıb.*

X.Nəsirzadə