Azərbaycan iqtisadiyyatının inkişafı, ölkədə çoxlu sayda müxtəlif tədbirlərin keçirilməsi, postpandemiya dövründə turist axınının bərpası - bütün bunlar müxtəlif biznes qruplarının ölkəyə marağını artırır. Onlardan biri də “Accor” qrupudur. “Accor New East Europe”un baş direktoru Aleksis Delaroff “İnterfaks-Azərbaycan” agentliyinə müsahibəsində qrupun Azərbaycanda və qonşu ölkələrdə mehmanxana biznesinin inkişafı planlarından bəhs edib.

- Aleksis, hazırda Azərbaycanda fəaliyyət göstərən neçə otel və mehmanxana “Accor” qrupunun idarəçiliyindədir?

Hazırda Azərbaycandakı portfoliomuza iki otel daxildir: məşhur “Alov qüllələri” kompleksində yerləşən möhtəşəm “Fairmont Baku” və 2021-ci ilin yayında açılmış ekonom sinifli “ibis Baku City” oteli. Yaxın vaxtlarda biz Azərbaycanda digər otel brendlərini də təmsil etməyi planlaşdırırıq, belə ki, bu bazar bu regionda qrupun inkişafı üçün əsas bazarlardan biridir.

- Bu günə qədər qrup Azərbaycandakı layihələrə nə qədər sərmayə yatırıb?

“Accor” daşınmaz əmlak sahəsində investor deyil: biz istər Azərbaycanda, istərsə də Sinqapurda və ya Londonda heç bir layihəyə investisiya qoymuruq. Biz mehmanxana sahiblərinə xidmət göstəririk, xüsusilə onların otelləri üçün dünya miqyaslı brendlər təklif edir, brendin bütün dünyada daha çox tanınmasına kömək edir, dünyanın ən yaxşı bron sistemlərindən birini, loyallıq proqramı, otellərin idarəçiliyi və bir çox digər xidmətlər təqdim edirik. Bizim bütün biznesimiz bundan ibarətdir.

- Pandemiya qrupun Azərbaycandakı fəaliyyətinə necə təsir göstərib və “Accor” postpandemiya dövründə perspektivləri necə qiymətləndirir?

Pandemiya dövründə biz planlaşdırılmış layihələr üzərində işləməyə davam etdik və 2021-ci ilin yayında yeni “ibis Baku City” otelini açdıq. Bu otel “ibis” şəbəkəsinin “Agora” yeni dizayn konsepsiyasına malik olan ilk otellərindən biri oldu. İndi vəziyyət sürətlə yaxşılaşmağa doğru gedir və hesab edirik ki, 2023-cü il biznesin tam bərpa olunacağı il olacaq (şirkətimizin “COVID-19” böhranı zamanı apardığı təhlilə uyğun olaraq).

- Pandemiya bütövlükdə qrupun fəaliyyətinə necə təsir göstərdi və qrup pandemiya nəzərə alınmaqla öz işində nəyi dəyişdi?

Biz təkmilləşdirilmiş sanitar təhlükəsizlik və sağlamlığın mühafizəsi tələblərini, o cümlədən nömrələrin, ictimai zonaların dezinfeksiyası protokollarını, qonaqların və işçi heyətin sağlamlıq vəziyyətinin izlənilməsini, qonaqların dezinfeksiya vasitələri ilə təmin olunmasını, otaq xidməti və restoranların fəaliyyəti ilə bağlı yeni reqlamenti nəzərdə tutan yeni ALLSAFE təhlükəsizlik standartını tətbiq etdik. Bu standartlar xidmət keyfiyyətinə xələl gətirməməklə qonaqların təhlükəsiz və rahat istirahətini təmin etmək üçün hazırlanıb. Bizim bütün otellərimiz bu gün də bu standartlara sadiqdir.

- Qrup Azərbaycanda otellər şəbəkəsini genişləndirməyi və ya mövcud otellərdə nömrələrin sayını artırmağı planlaşdırırmı?

Hazırda biz Azərbaycanın dəniz, sağlamlaşdırma və dağ-xizək kurortlarını, eləcə də Bakıda yeni layihələri nəzərdən keçirərək inkişaf planları qururuq. “Accor” kurort otellərinin sayına görə dünya liderlərinin ilk üçlüyündə yer alır, brendlərimiz bütün dünyada məşhurdur və bizim Azərbaycanın mehmanxana bazarına təklif edəcəyimiz layihələr var.

- Qrup ortamüddətli dövrdə Azərbaycanda hansı yeni layihələr həyata keçirməyi planlaşdırır və bu layihələrə hansı məbləğdə sərmayə qoyuluşu nəzərdə tutulur?

Hazırda bu, məxfi məlumatdır. Yeni layihələr imzalandıqdan sonra bununla bağlı xəbərləri mütləq bölüşəcəyik.

- Azərbaycanda biznes mühitini necə qiymətləndirirsiniz?

Azərbaycandakı tərəfdaşlarımız və otel sahibləri ilə həmişə çox yaxşı və konstruktiv münasibətlərimiz olub və biz ölkədə iqtisadi, sosial və maliyyə mühitinin daim yaxşılaşdığını görürük.

- Qrupun yaxın illər üçün Cənubi Qafqazda və bütövlükdə MDB ölkələrində mövcudluğunu genişləndirməklə bağlı hansı planları var?

“Accor” yeni bir bazarda inkişaf edəndə biz lider mövqe tutmağı və nömrə bir olmağı hədəfləyirik. Bizim strukturumuzda Azərbaycanın daxil olduğu region “NewEastEurope” adlanır - o, keçmiş Sovet İttifaqının doqquz ölkəsini birləşdirir. Bu gün bizim portfoliomuza bu regionda 80-ə yaxın otel daxildir və ümid edirik ki, ilin sonuna kimi daha 3-4 otel aça biləcəyik. “Accor” regionda lider mövqe tutan mehmanxana operatorudur və biz yeni istiqamətlər açmaqla və bazara yüksək tələbatın olduğu yeni məhsullar çıxarmaqla genişlənməyə davam edirik.

- Azərbaycanda fəaliyyət qrupa regionun və MDB-nin digər ölkələri ilə müqayisədə nə kimi üstünlüklər qazandırır?

Son illər Azərbaycan turizmin inkişafına fəal dəstək verir və biz qeyd edirik ki, ölkəyə gələn xarici qonaqların sayı getdikcə çoxalır. Yaxın Şərqdən olan turistlərin sayında artım müşahidə olunur və ölkənin güclü infrastrukturu sayəsində biznesin bu seqmenti yaxşı inkişaf edir. Biz mövsümlərarası dövrdə və aşağı mövsümdə ölkənin bölgələrində turizmin inkişafına kömək edəcək əlavə proqramların bundan sonra da inkişaf etdiriləcəyinə ümid edirik.*

Söhbət etdi Anar Əzizov