2013-cü ilin I rübündə Azərbaycanda sığorta şirkətlərinin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə ümumi haqları 8 mln. 567 min 286,67 manat təşkil edib, bu isə 2012-ci ilin analoji dövrünün göstəricisindən 77,1% çoxdur. Bu barədə “İnterfaks-Azərbaycan” agentliyinə Maliyyə Nazirliyinin Dövlət Sığorta Nəzarəti Xidmətindən məlumat verilib.

Azərbaycanda sığortanın bu növü üzrə xidmətləri 3 sığorta şirkəti göstərir.

Xidmətin məlumatına görə, 2013-cü ilin yanvar-mart aylarında sığortaçılar bu sığorta növü üzrə 284 min 570,69 manat məbləğində ödəniş həyata keçiriblər (artım 4,3 dəfə).

“İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” Qanun 2010-cu ilin iyul ayından qüvvəyə minib. 2010-cu ilin dekabrında bu sığorta növü üzrə xidmətlərin göstərilməsi üçün normativ-hüquqi aktların təsdiq edilməsi prosesi başa çatıb.

Nazirlər Kabineti 2010-cu ilin noyabr ayında istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə tarifləri təsdiq edib. Nazirlər Kabinetinin qərarına əsasən, iqtisadi fəaliyyətin bütün növləri 14 risk dərəcəsinə ayrılıb. Bu risk səviyyəsindən irəli gələrək qulluqçular və fəhlələr üçün sığorta tarifi müəssisənin risk səviyyəsindən asılı olaraq 0,2%-dən 2%-ə qədər təşkil edir.

Qanuna əsasən, sığorta tarifi müəssisədə əmək haqqı fonduna hesablanır.

Qanunda üç növ sığorta ödənişi nəzərdə tutulur: aylıq, birdəfəlik və əlavə.