Rusiya İnformasiya və Mədəniyyət Mərkəzində (RİMM) Beynəlxalq Analar Gününə həsr olunmuş gecə keçirilib. Bu barədə “İnterfaks-Azərbaycan” agentliyinə RİMM-dən məlumat verilib.

Bayramın keçirilməsində məqsəd qadına qayğıkeş münasibət ənənəsini dəstələmək, ailə təməlini möhkəmləndirmək, həyatımızdakı əsas insanın - ananın rolunu xüsusi qeyd etməkdir.

Gecənin iştirakçıları tədbirin Bakının 228 saylı məktəbinin rus dili və ədəbiyyatı müəlliməsi Elmira Cavadovna Hüseynovanın təşəbbüsü ilə keçirilməsi barədə məlumatı təəccüb və məmnunluqla qarşılayıblar.

1988-ci il oktyabrın 30-da o, ilk dəfə öz məktəbində məhz bu adda bayram təşkil edib. Bu bayramda bütün məktəblilərə bayramı beynəlxalq bayrama çevirmək çağırışının yer aldığı müraciət qəbul edilib. O zaman müxtəlif Sovet qəzetləri bu müraciətin mətnini dərc etmişdilər.

Ölkənin bir çox məktəbləri bu gözəl ənənəni davam etdirdilər və bayram tədricən ümumxalq bayramına çevrildi.

Tədbirdə Musiqi Akademiyasının tələbələri Nərmin Əliyeva, Ramil Hüseynli və Dilarə Əliyeva anaya həsr olunmuş mahnılar ifa ediblər.

Konsert başa çatdıqdan sonra “Bir dəfə, 20 il sonra” adlı bədii film nümayiş etdirilib.

Rusiyada Analar Günü prezident Boris Yeltsinin fərmanı ilə 1998-ci il yanvarın 30-da təsis edilib və hər il noyabrın son bazar günü qeyd edilir.

A.Zeydullayeva