Milli Məclisin Müdafiə, təhlükəsizlik və korrupsiya ilə mübarizə komitəsi bazar ertəsi keçirilən iclasda Xəzər dənizində təhlükəsizliyin təminatı və terrorçuluqla mübarizəyə dair sazişləri təsdiq edib. Bu barədə “İnterfaks-Azərbaycan” agentliyinə parlamentdən məlumat verilir.

Komitənin iclasında “Xəzər dənizində insidentlərin qarşısının alınması haqqında” saziş (12 avqust 2018-ci il Aktauda imzalanıb - İF), həmçinin, “2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” sazişə Xəzər dənizində terrorçuluqla mübarizədə əməkdaşlıq üzrə” protokol, 2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” sazişə Xəzər dənizində mütəşəkkil cinayətkarlıqla mübarizədə əməkdaşlıq üzrə” protokol, 2010-cu il 18 noyabr tarixli “Xəzər dənizində təhlükəsizlik sahəsində əməkdaşlıq haqqında” sazişə Sərhəd orqanları arasında əməkdaşlıq və qarşılıqlı fəaliyyət üzrə” protokol təsdiq olunub.

“Qeyd edilən sənədlər parlamentin plenar iclasında baxılması üçün tövsiyyə edilib”, - Milli Məclisdən bildiriblər. **

R.Babayev