Litva prezidenti Qitanas Nauseda Azərbaycan prezidenti İlham Əliyevi Vilnüsə səfərə dəvət edib. Bu barədə dövlət başçısının saytında məlumat verilir.

İ.Əliyev bu gün Litva Respublikasının ölkəmizdə yeni təyin olunmuş fövqəladə və səlahiyyətli səfiri Eqidius Navikasın etimadnaməsini qəbul edib.

“Mən, ilk növbədə, Sizə Litva prezidenti Nausedanın ən xoş arzularını, eləcə də Sizin Litvaya səfərinizlə bağlı dəvəti çatdırmaq istəyirəm”, - deyə səfir bildirib.

O, Azərbaycan və Litva arasında yüksək səviyyəli siyasi dialoqun məmnunluq doğurduğunu bildirib.

Öz növbəsində, İ.Əliyev qarşılıqlı ticarət dövriyyəsinin artırılması mümkünlüyünü qeyd edib. “Əməkdaşlığın ənənəvi və yeni sahələri mövcuddur. Əlbəttə, ticari-iqtisadi əməkdaşlıq cəhətdən müəyyən işlər görülməlidir. Ticari-iqtisadi əlaqələri artırmaq məqsədilə müəyyən işçi qruplar yaratmaq olar. Biz bütün digər istiqamətlərdə də ənənəvi əməkdaşlığı davam etdirmək, tərəfdaşlığı möhkəmləndirmək niyyətindəyik”, - deyə prezident vurğulayıb.*

F.İsazadə