2020-ci ilin yanvar-iyul aylarında Azərbaycanda bütün növ nəqliyyat vasitələri ilə 111,2 milyon ton yük daşınıb ki, bu da 2019-cu ilin yanvar-iyul aylarının göstəricisindən 14,3% azdır. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.

Daşımaların azalması koronavirus pandemiyası və onun yayılmasının qarşısının alınması məqsədilə karantin rejiminin tətbiqi ilə əlaqədardır.

Yük daşımalarının strukturunda 78,4% qeyri-dövlət nəqliyyat müəssisələrinin, 21,6% dövlət sektorunun payına düşüb. Bununla yanaşı, cari ilin yanvar-iyul aylarında qeyri-dövlət nəqliyyat müəssisələri tərəfindən yük daşımalarının həcmi ötən ilin müvafiq dövrü ilə müqayisədə 17,9% azalıb.

Hesabat dövründə dəmir yolu ilə 8,3 milyon ton (tranzit yüklər daxil olmaqla) yük daşınıb ki, bu da ötən ilin müvafiq dövrünün göstəricisindən 1,7% çoxdur.

Dəniz nəqliyyatı ilə 3,52 milyon ton (azalma 1,2%), avtomobil nəqliyyatı ilə 65,3 milyon ton (azalma 21,5%), hava nəqliyyatı ilə 228,9 min ton (artım 2,1 dəfə) müxtəlif yük daşınıb.

Yanvar-iyul aylarında daxili neft kəmərləri vasitəsilə 20 milyon 997,2 min ton neft (azalma 9,6%) nəql olunub.

Nəqlin qalan həcmi magistral qaz kəmərlərinin payına düşüb.*

B.Rüstəmbəyov