ABŞ və onun avropalı müttəfiqləri erməni və azərbaycanlı millətçiləri Qarabağda atəşkəs razılaşmasını pozmağa təhrik edir. Bunu bu gün Rusiya Xarici Kəşfiyyat Xidmətinin direktoru Sergey Narışkin deyib.

"NATO-nun aparıcı ölkələri Rusiyanın fəal iştirakı ilə Azərbaycan və Ermənistan arasında Dağlıq Qarabağda atəşkəs haqqında əldə edilmiş razılaşmadan qıcıqlandıqlarını gizlətməyə çalışırlar. ABŞ və müttəfiqləri müharibənin Moskvanın vasitəçiliyi ilə dayandırılmasından məyus olublar. Axı bu, əslində, onların Rusiyanın Zaqafqaziyadan sıxışdırılıb çıxarılması üçün uzun illər ərzində gördükləri işi heç edib”, - deyə onun açıqlamasında bildirilir.

"Bizdə olan məlumata görə, bəzi Qərb ölkələri mövcud kanallar vasitəsilə erməni və azərbaycanlı millətçiləri atəşkəs haqqında razılaşmanı pozmağa təhrik edirlər. Erməniləri inandırmağa çalışırlar ki, Dağlıq Qarabağda sülh İrəvanın məğlubiyyətidir. Azərbaycanlılara isə əksinə, deyirlər ki, Azərbaycan Ordusu Xankəndinin alınmasına bir addım qalmış Kreml onların qələbəsini oğurlayıb", - deyə Narışkin vurğulayıb.

O qeyd edib ki, nə ABŞ, nə də Avropa regionda formalaşmış qüvvələr balansı ilə barışmaq istəmir və buna görə Azərbaycan və Ermənistan xalqları arasında nifaqı yenidən qızışdırmağa çalışmaqdan daha yaxşı heç nə fikirləşməyiblər.

"Bu cür hərəkətlər ABŞ-ın və onların avropalı dostlarının öz vəzifələrini həmişə olduğu kimi, sadə insanların, bu dəfə isə azərbaycanlıların və ermənilərin maraqları hesabına həll etmələrinin daha bir sübutdur. Amerikalılar və avropalılar törətdikləri təxribatların yenidən qan tökülməsinə gətirib çıxara, regionu ağır hərbi münaqişəyə sürükləyə biləcəyindən narahat deyillər", - deyə direktor vurğulayıb.*