Ççərşənbə günü Azərbaycanın xarici işlər naziri Ceyhun Bayramov Böyük Britaniyanın Yaxın Şərq, Şimali Afrika, Cənubi Asiya və BMT üzrə dövlət naziri Tariq Mahmud Əhməd ilə görüş zamanı Bakı ilə London arasında əməkdaşlığı, o cümlədən regional məsələləri müzakirə edib.

“Görüşdə Azərbaycan və Böyük Britaniya arasında mövcud ikitərəfli və çoxtərəfli əməkdaşlıq gündəliyində duran aktual məsələlər, o cümlədən regional məsələlər müzakirə olunub”, - XİN-in məlumatında deyilir.

Qeyd olunur ki, Bayramov əlaqələrin daha da inkişaf etdirilməsi üçün mövcud imkanlardan istifadənin zəruriliyini diqqətə çatdırıb.

O, iki ölkənin birgə layihələrin həyata keçirilməsi təcrübəsinə istinad edərək Bakının London ilə bu əməkdaşlığı davam etdirilməsində maraqlı olduğunu söyləyib.

Nazir həmçinin alternativ enerji resurslarının inkişaf etdirilməsi üçün geniş imkanların olduğunu vurğulayıb.

Azərbaycan XİN başçısı Cənubi Qafqazda mövcud vəziyyət, Qarabağ və Şərqi Zəngəzurda aparılan genişmiqyaslı bərpa və quruculuq işləri, Bakı və İrəvan arasında münasibətlərin normallaşması ilə bağlı Əhmədi məlumatlandırıb. Bayramov Böyük Britaniyanın mina təhdidinə qarşı mübarizə istiqamətində göstərdiyi dəstəyi yüksək qiymətləndirib.

Öz növbəsində, Tariq Mahmud Əhməd Bakı ilə London arasında strateji dialoqun genişləndirilməsinin vacibliyini qeyd edib. O bəyan edib ki, Böyük Britaniya regionda sülh və təhlükəsizliyin bərqərar edilməsi istiqamətində səyləri, o cümlədən Azərbaycan və Ermənistan arasında münasibətlərin normallaşması prosesini dəstəkləyir.

Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb.

Görüş Reykyavik şəhərində Avropa Şurasının Dövlət və Hökumət Başçılarının 4-cü Zirvə Görüşü çərçivəsində baş tutub. **

R.Kərimov