İsrail Müdafiə Ordusu gecə Qəzza zolağında HƏMAS və digər Fələstin qruplaşmalarına qarşı genişmiqyaslı əməliyyatlar keçirib, anklavın cənubunda şiddətli döyüşlər gedir. Bu barədə “The Times of Israel” nəşri şənbə günü məlumat yayıb.

Nəşr mənbələrə istinadən yazır ki, döyüşlər HƏMAS rəhbərliyinin bir hissəsinin olduğu ehtimal edilən Qəzzanın cənub hissəsindəki Xan-Yunis şəhəri ərazisində gedir.

Tərəflər atəşkəsin uzadılması barədə razılığa gələ bilmədikləri üçün İsrail cümə günü yenidən Qəzzanı bombalamağa başlayıb. İsrail baş naziri Benyamin Netanyahunun ofisi HƏMAS-ı atəşkəs razılaşmasının şərtlərini pozmaqda günahlandırıb. Belə ki, qruplaşma İsrailə raket hücumları həyata keçirib və girov götürülmüş israillilərin azad edilməsini dayandırıb.

İsrail hərbi əməliyyatları bərpa edib və coğrafiyasını genişləndirib. İsrail Müdafiə Ordusunun cümə günü yaydığı məlumata görə, Qəzzada terrorçuların obyektlərinə, o cümlədən anklavın cənubuna zərbələr endirilib.*