ABŞ-ın müdafiə naziri Lloyd Ostin qarşıdakı istirahət günlərində Yaxın Şərqə (İsrail, Bəhreyn və Qətər) səfər edəcək. Bu barədə Pentaqonun nümayəndəsi brifinqdə bildirib.

İsraildə Ostin beynəlxalq humanitar hüquqa uyğun olaraq bu ölkənin özünümüdafiə hüququna ABŞ-ın sarsılmaz sadiqliyini vurğulamaq, habelə İsrailin mülki əhaliyə (Qəzzanın – İF) dəyən zərəri azaltmaq üçün atdığı addımları müzakirə etmək niyyətindədir.

Nümayəndənin sözlərinə görə, Ostin İsrail hərbi rəhbərliyi ilə quru əməliyyatları və hava hücumları başa çatdıqdan sonra növbəti addımlarla bağlı da fikir mübadiləsi aparacaq, çünki əməliyyatların növbəti mərhələsinə keçidlə bağlı qərarı İsrail qəbul etsə də, nazir planları öyrənməkdə maraqlıdır.

Pentaqon rəhbəri Bəhreyndə ABŞ Hərbi Dəniz Qüvvələri Komandanlığını ziyarət edəcək.

Aparılacaq danışıqlarda ABŞ-ın gəmiçilik və dünya iqtisadiyyatını təhdid edən husi qiyamçıların təcavüzünə cavab vermək üçün çoxtərəfli koalisiyalar qurmaq səylərinə diqqət yetiriləcək.

Ostin Qətərdə HƏMAS tərəfindən Qəzzada saxlanılan girovları azad etmək üçün göstərdiyi vasitəçilik səylərinə görə ölkə rəhbərliyinə təşəkkür edəcək, həmçinin Əl-Udeid aviabazasına baş çəkəcək.

ABŞ müdafiə naziri, həmçinin Aralıq dənizindəki Gerald Ford təyyarədaşıyan gəmisinə baş çəkməyi və onun ekipajı ilə görüşməyi də planlaşdırır.*