Azərbaycan OPEC+ əməkdaşlıq formatını effektiv hesab edir və gələcəkdə razılaşmanın iştirakçısı olan ölkələr arasında məsləhətləşmələr prosesində fəal iştirak etməyi planlaşdırır. Bunu energetika naziri Pərviz Şahbazov deyib.

“Qeyd etmək istəyirəm ki, OPEC+ formatının yaradılması təşəbbüsü ilk dəfə 2016-cı ilin yanvar ayında Azərbaycan Prezidenti cənab İlham Əliyev tərəfindən Davos Forumunda irəli sürülüb. OPEC+ çərçivəsində əməkdaşlıq bu günə kimi mühüm əhəmiyyət kəsb edir, xüsusilə də COVID-19 pandemiyasının davam edən təsiri kontekstində”, - deyə Şahbazov “Нефтегазовая вертикаль” jurnalına müsahibəsində bildirib.

Onun sözlərinə görə, OPEC+ formatında əməkdaşlıq Bəyannaməni imzalayan neft istehsalçıları və ixracatçılarının maraqlarına xidmət etməklə yanaşı, həm də dünya neft bazarında tarazlığın təmin edilməsində mühüm rol oynayır.

“Məhz OPEC+ çərçivəsində əməkdaşlıq sayəsində dünya bazarında müəyyən tarazlıq və neft hasil edən ölkələr üçün nisbətən münasib qiymət səviyyəsi təmin olunub”, - deyə nazir qeyd edib.

Şahbazov əlavə edib ki, Azərbaycan bu formatın işində fəal iştirak edir. “Azərbaycan 2020-ci il aprel ayının 12-də OPEC-ə üzv və qeyri-üzv ölkələrin nazirlərinin 10-cu iclasında qəbul edilmiş və gündəlik neft hasilatının üç mərhələdə azaldılmasını nəzərdə tutan “Əməkdaşlıq Bəyannaməsi”nin təsdiq edilməsi barədə qərarı dəstəkləyib. Düşünürəm ki, OPEC+ formatında qəbul edilən qərarların və atılan addımların doğruluğu şübhə doğurmur. Azərbaycan dünya neft bazarının sabitləşməsinə yönəlmiş tədbirləri dəstəkləyir, fəal iştirakçıdır və OPEC+ ölkələri arasında konsensusa nail olunması məqsədilə gələcəkdə də məsləhətləşmələr prosesində fəal iştirak etməyi planlaşdırır”, - deyə energetika naziri vurğulayıb.*

N.Abbasova