Vergilər Nazirliyi və Beynəlxalq Valyuta Fondunun (BVF) nümayəndələri 2012-2013-cü illər üzrə vergi daxilolmaları ilə bağlı fikir mübadiləsi aparıblar. Bu barədə nazirliyin saytında yerləşdirilmiş məlumatda deyilir.

Vergilər nazirinin birinci müavini Natiq Əmirov BVF-nin Yaxın Şərq və Mərkəzi Asiya Ölkələri Departamentinin baş iqtisadçısı Mariya Albino-Uoru ilə görüş keçirib.

"Görüşdə Vergi Məcəlləsinə nəzərdə tutulan dəyişikliklər, 2011-ci ildə vergi gəlirlərinin icrası, 2012-2013-cü illər üçün vergi daxilolmaları üzrə proqnozların icrası, qeyri-neft sektorundan vergi daxilolmalarının yığılmasının gücləndirilməsi ilə bağlı görülən tədbirlər müzakirə edilib", - deyə məlumatda bildirilir.

Bundan başqa, Azərbaycanda vergi inzibatçılığının təkmilləşdirilməsi, elektron xidmətlərin tətbiqinin genişləndirilməsi və nağdsız ödənişlərin stimullaşdırılması, vergitutma bazasının genişləndirilməsi və qeyri-neft sektorundan vergi daxilolmalarınn artırılması ilə bağlı məsələlər müzakirə mövzusu olub.