Regionda İslam Bankçılığının tətbiqində ilk addım atan Azərbaycan Beynəlxalq Bankı (ABB) Malayziya Mərkəzi Bankı tərəfindən təşkil olunan Qlobal İslam Maliyyə Forumuna (GIFF) dəvət alıb.

GİFF sentyabrın 18-20-də Kuala-Lumpurda keçirilir.

GİFF 2012-nin mövzusu “İslam maliyyəsinin beynəlmiləlləşdirilməsi: iqtisadiyyatlar arasında əlaqələrin yaradılması”, məqsədi inkişafda olan İslam iqtisadiyyatı industriyasının beynəlxalq potensialının araşdırılmasıdır.

“Bizim məqsədimiz ölkəmizi təmsil etmək və Azərbaycanın bank sektoru haqqında ətraflı məlumat verməkdir. Dünyada sürətlə inkişaf edən iqtisadiyyatlar sırasında olan Azərbaycana forum iştirakçılarının əksəriyyəti böyük maraq göstərirlər. Onlar bizimlə əməkdaşlığın gələcəkdə geniş imkanlar açacağını nəzərə alırlar və İslam bankçılığı sahəsi də bu əməkdaşlıq potensialından kənarda qalmayıb. Hazırda İslam bankçılığının dünyada inkişaf etdirilməsində Malayziya böyük rol oynayır. Azərbaycanda da bu sahəni inkişaf etdirmək məqsədilə biz Malayziyadan olan həmkarlarımızın təcrübəsindən istifadə etməyi düşünürük”, – deyə ABB-nin İslam bankçılığı Departamentinin direktoru Behnam Qurbanzadə bildirib.

GIFF-2012-də İslam maliyyəsinin potensialı, iqtisadi əlaqələrin yaradılması, həmçinin əlaqələrin qurulması və möhkəmləndirilməsi məqsədilə iqtisadi sahənin mütəxəssisləri, tənzimləyici orqanların nümayəndələri, şəriət alimləri və dünyanın hər bir yerindən olan biznes dairələrinin nümayəndələri iştirak edir.

Bu Forum Malayziya Qiymətli Kağızlar Komissiyası, İslam Bankçılığı İnstitutları Asossiasiyası, Malayziya İslam Bankçılığı və Maliyyə İnstitutu, Malayziya İslam Sığortası Asossiasiyası, İslam bankçılığı üzrə şəriətin araşdırılması Beynəlxalq Akademiyası və Malaziya Birjasının birgə əməkdaşlığı ilə təşkil olunub.

Xəbər verildiyi kimi, Azərbaycan Beynəlxalq Bankı (ABB) 2012-ci ilin sentyabrın əvvəlində respublikada İslam bankinqinin tətbiq edilməsi layihəsi çərçivəsində “İslam Pəncərəsi”nin tətbiqini elan edib. ABB İdarə Heyətinin qərarı ilə bankda İslam bankinqi Departamenti yaradılıb. ABB-də İslam bankinqinin tətbiqi mərhələli şəkildə həyata keçiriləcək. 2012-ci ilin sonuna qədər Department tamamilə formalaşdırılacaq və yeni ofisə yerləşdiriləcək.Həmçinin, növbəti üç ay ərzində departamentin investisiya portfelinin formalaşdırılması, eləcə də maliyyələşdirmə xətlərinin və cari layihələrin departamentin idarəçiliyinə verilməsi başa çatdırılacaq.

Yeni qurum 2013-cü ilin yanvar ayından korporativ və fərdi müştəriləri maliyyələşdirməyi planlaşdırır.

Xəbər verildiyi kimi, ABB bankda islam bankçılığı üzrə ixtisaslaşan strukturun yaradılması üçün “Salans/KPMG/Pinsent Masons/Dar al Shariah” şirkətlər konsorsiumunu məsləhətçi seçib.

Azərbaycan Beynəlxalq Bankı 1992-ci ildə təsis edilib və Azərbaycanın ən iri bankıdır. Hazırda bankın səhmlərinin 50,2%-i dövlətə, 49,8%-i özəl səhmdarlara məxsusdur. AMB-nin səhmdarları 14 hüquqi və 1,556 min fiziki şəxsdir.