İcbari Sığorta Bürosunun (İSB) üzvü olan sığorta şirkətləri 2014-cü ilin I yarısında avtonəqliyyat vasitəsi sahiblərinin mülki məsuliyyətinin icbari sığortası üzrə 12 mln. 503,28 min manat ödəniş ediblər. Bu barədə İSB-nin məlumatında qeyd edilir.

Xəbər verildiyi kimi, 2013-cü ilin birinci yarısında İSB üzvləri tərəfindən avtonəqliyyat vasitəsi sahiblərinin mülki məsuliyyətinin icbari sığortası üzrə ödənişlər 10,8 mln. manatı ötüb. Beləliklə, 2014-cü ilin I yarısında avtonəqliyyat vasitəsi sahiblərinin mülki məsuliyyətinin icbari sığortası üzrə ödənişlər 15,7% artıb.

Büronun məlumatına əsasən, 2014-cü ilin iyun ayında İSB üzvləri avtonəqliyyat vasitəsi sahiblərinin mülki məsuliyyətinin icbari sığortası üzrə 1 mln. 436,630 min manat məbləğində ödəniş həyata keçiblər. İyunda bu növ üzrə 1,145 min sığorta tələbi üzrə ödənişlər həyata keçirilib.

Hesabat ayında nəqliyyat vasitəsinə dəyən ziyana görə 1,062 min sığorta hadisəsi üzrə 1 mln. 258 min manat, əmlaka dəyən ziyana görə 41,155 min manat (30 tələb), sağlamlığa dəyən zərərə görə 36,75 min manat (33 tələb), ölümlə nəticələnmiş yol-nəqliyyat hadisəsinə görə 100 min manat (20 hadisə) məbləğində ödəniş həyata keçirilib.

2011-ci il dekabrın 16-dan Azərbaycanda avtonəqliyyat vasitəsi sahiblərinin mülki məsuliyyətinin icbari sığortası üzrə polislərin yeni tarif və şərtlərlə satışına başlanılıb.

Xüsusilə 50 manat məbləğində baza tarifi müəyyən olunub və mühərrikin həcmi 1500 kubsantimetrə qədər olan avtonəqliyyat vasitələrinə tətbiq olunur. Mühərrikin həcmi artdıqca 1,5-5 əmsalları tətbiq olunur. Mühərrikin həcmi 5 min kubsantimetrdən çox olan avtonəqliyyat vasitələri üçün 5 əmsalı tətbiq olunur, yəni sığorta tarifi 250 manat təşkil edir.

Sərnişindaşıma ilə məşğul olan avtobus və mikroavtobuslar üçün sığorta tarifi hesablananda əmsallar onların sərnişin yerlərinin sayından asılıdır. Belə ki, 9-16 sərnişin yerinə görə əmsal 3, 16-dan artıq yerə görə əmsal 4 tətbiq edilir.

Yük avtomobillərində əmsal yükgötürmə qabiliyyətindən asılı olaraq 3-dən 5-ə qədər təşkil edir.

Motosiklet, traktor və digər kənd təssərrüfatı texnikası üçün əmsal 1-ə bərabərdir.

Avtonəqliyyat vasitəsi sahiblərinin mülki məsuliyyətinin icbari sığortası üzrə əmlaka dəymiş ziyana görə sığorta məbləği 5 min manat, sağlamlığa vurulan zərərə görə 5 min manat (bir nəfərə görə), bir sığorta hadisəsinə görə ümumi limit 50 min manat təşkil edir. Beləliklə, avtonəqliyyat vasitəsi sahiblərinin mülki məsuliyyətinin icbari sığortası üzrə ödənişin maksimum məbləği 55 min manat təşkil edə bilər.

İSB “İcbari sığortalar haqqında” qanunun tətbiqi çərçivəsində yaradılıb. 15 sığorta şirkəti büronun üzvüdür. Onlardan 11-i avtonəqliyyat vasitəsi sahiblərinin mülki məsuliyyətinin icbari sığortası üzrə xidmət göstərmək hüququna malikdir.

2013-cü ildə sığortaçıların avtonəqliyyat vasitəsi sahiblərinin mülki məsuliyyətinin icbari sığortası üzrə ödənişləri 25 mln. 330,18 min manat təşkil edib.

A.Əzizov