SOCAR daxili bazarda dollarla buraxılan istiqraz yerləşdirməyi planlaşdırır.

"SOCAR sentyabrın 20-də daxili bazarda dollarla buraxılan istiqrazları satışa çıxarmağı planlaşdırır. İstiqrazlar üzrə gəlirlilik illik 5% təşkil edəcək. İstiqrazların satışı 10 oktyabr tarixinədək davam edəcək", - deyə şirkətin nümayəndəsi “İnterfaks-Azərbaycan” agentliyinə bildirib.

Onun sözlərinə görə, SOCAR sentyabrın 16-da ictimaiyyət üçün istiqrazların təqdimatını keçirəcək.

"İstiqrazların daxili bazarda yerləşdirilməsində əsas məqsəd maliyyə mənbələrinin şaxələndirilməsi, eləcə də əhali üçün yeni investisiya imkanlarının yaradılmasıdır”, - deyə nümayəndə qeyd edib.

İstiqrazların emissiya həcmi açıqlanmayıb.

Bu, SOCAR tərəfindən istiqrazların daxili bazarda ilk yerləşdirilməsi olacaq. Şirkət artıq avrobond buraxılışı üzrə təcrübəyə malikdir, yəni xarici bazarlarda 3 dəfə istiqraz yerləşdirib.*

A.Əzizov